ZALEN August 9, 2026: Mizoram Public Service Commission chuan Mizo Zirlai Pawl (MZP)-in One Time Registration (OTR) tihtawp an rawtna chu thil remchang loah an ngai tih an sawi.

MPSC secretary-in Zirtawpni kaltaa MZP general secretary lehkha a chhannaah OTR tihtawp a rem loh chhan hrang hrang a tar lang a, chung zingah chuan OTR hi an tîtâwp emaw, OTR-a document upload kim lote avanga offline-a document thehluhna hun an hawsak leh emaw a nih chuan MPSC chu tute emaw hamthatna tur bik chauh ngaihtuahna avanga thil ti a ang dawn tih a tel. 

Ram Dânpui, Article 14 (Equality before the law) leh Article 16 (Equality of opportunity in matters of public employment) palzûtna a nih theih dawn avangin thil tih chi a ni lo tih te, OTR-a document upload lo emaw, upload tlai (dilna hun tawp hnu) avanga dilna hnawlsak tawhte zinga mi thenkhat chu Gauhati High Court, Aizawl Bench-ah an zualko mek. 

Court-a thu kal lai a ni a, court-in thu chhuah a siam hmaa kan kal dan tihdanglam chu a remchang lo a ni tih bakah thil tha zawk duhna avanga siam, OTR hi tîtâwp a nih chuan hemiin hamthatna leh awlsamna a ken telte chu candidate-te leh MPSC-in an chân/hloh vek dawn tihna a ni a. “India state PSC zingah OTR hmang lo an awm tawh loh zâwk laia he thil tîtâwp emaw, offline-a document thehluh theih hun siam thar chungchang chu tun dinhmunah sawi thu a chêng lovah MPSC chuan a ngai a ni,” a ti.