Sawrkar hnathawk la tur liau liaua din; inkai tura beisei Mizoram Public Service Commission chuan sawisel a tawk mek a, kil 3 ah sel rawn an ni a. Eptu lam chuan MPSC chairman lak a nih danah fehlel awm niaan sawi laiin Commission chuan Chairman thar chu India danpui tlawhchhana ruat niin an thuchhuahah tarlan a ni. Hetih lai hian MPSC Secretary chuan MPSC ah sawrkarin a duh zawng a ruat thei tia a sawi chu MNF party chuan mipui zah loh naah ngaiin ngaihdam dil turin an kar tlu tawh a. Hetiang a thlen lai hian Kohhran rawngbawltu pakhat chuan MPSC member ruat a nihna pawmin Synod ah chawlh a dilna chu pawmsak a ni bawk a, hei hian boruak a tisang zuala. Amah pawh insawifiahin sawrkar chuan Reverend pakhat Sawrkarin dah a tum sa avang leh Synod in chawlh a dilna a pawmsak avanga member ruat a nihna chu pawm ta niin tualchhung Vanglaini ah chanchinbuah tarlan a ni tawh a. Sawrkarna chelh mektu Congress leh Eptu party MNF te chu an inbei nasa hle a. Ngaihdan thuhmun fo thei lo mahse kan puithiam te zinga a tha ber pawla ngaih party inbeihnaa hnuhluh a ni hi a pawi khawp mai; Kohhran mite rilru a hliam a ni. Heng thil thlen hun chhung hi a rei lo hle a, mipui rilru lak penna atana remruatna awm nia ngaih a nih laiin tum lawk niloin a in nangfuh mai nia tanhmun khawh an awm bawk. MPSC hian tun hmaah sel a lo tawk zauh zauh tawh a, member ruat chungchangah tu Party pawh nise sawrkar chuan an duhsakte dah thin nia ngaihna a awm fo thin a, mithiam an niha dan tehfunga tling an nih chuan sawrkarin a duhsak zawng a ruat a nih pawhin mipui lam chuan hriat thiam na thu tak an nei niin a lang a ni. Eng pawh nise, MPSC ah mipuiin rinna an nghat zel ngam ang em? A thiam fal pahnih khat dan zawh loh awm mahse candidate a bak zawng chu intluk tlang an nih tlangpui chuan thuneitute’n an duhzawng an thur nalh nalh thin nia ngaihdan awmte hi a dik a nih palh chuan chuan thalai hna zawng chu sawi loh mipui pawhin he Commission-ah hian rinna an nghakloh hun a thleng thei a. Langtlang tura beisei an ni a, tih bik awm loa hna dilte chu an thiamna leh ti that dan indawta la turin mi tam zawk chuan an duh a rinawm. Hetiang hi a pha lo thei tih tur tingin boruak a inmung chho mek a, he ngaihdan hi paihthla tur khawpa hmalakna a awm loh chuan thalai sarkar hna zawngte a ti beidawng dawn a, a aia chhia a hrin chhuah a hlauhawm hle mai. Inham tang velote’n sawipuitu neih loh vang chauha tling loah an inngai anga, a tlingte chu zah an kai hauh lo ang. Sawipuitu nei ve lo nia inngai lehkhathiam leh angaihna hriate beidawnna khur thukah an tlu lut a nih chuan; kan ram tan chu aia hlauhawm a tam hauh lo a. Hetiang a thlen lohna turin thuneitute pawhin an kal zel dan tur ruahmanna fel fai an mamawh ber a ni.