ZALEN August 13, 2026: Mizoram Larsap General (Dr) Vijay Kumar Singh chuan vawiin khan Mizoram Public Service Commission (MPSC) Member atan K. Lalrinzuali, IAS (Retd) chu Durbar Hall, Lok Bhavan, Aizawl-ah rinawmna thu tiam tirin a la lut.

Lakluhna inkhawmah hian Chief Secretary Khilli Ram Meena chuan Larsap-in MPSC Member atana K. Lalrinzuali a ruatna notification a chhiar chhuak hmasa a. Hemi hnu hian Larsap chuan rinawmna thutiam chham tirin K. Lalrinzuali chu MPSC Member atan a lalut a ni.

He hunah hian Chief Minister Lalduhoma, Speaker Lalbiakzama, Home Minister K. Sapdanga, PWD Minister Vanlalhlana, AH& Vety. Minister C. Lalsawivunga, EF&CC Minister Lalthansanga, Health & Family Welfare Minister Lalrinpuii, Opposition Leader Lalchhandama Ralte, P&E Minister F. Rodingliana, RD&A Minister Prof. Lalnilawma leh sawm bik mi pawimawh dangte an tel a ni.

K. Lalrinzuali hi July ni 11, 1966 ah piangin thiamna lamah Public Administration Gold Medalist a ni a. Kum 1992 khan Mizoram Civil Service (MCS) a zawm a. Kum 2019 ah IAS ah promote niin AGMUT Cadre 2010 pek a ni a. Mizoram sawkara Commissioner & Secretary, Health & Family Welfare Department leh Power & Electricity Department hna a chelh laiin July ni 31, 2026 khan superannuation pension-in a chhuak a ni.

Mizoram Sawrkara post pawimawh tak tak a chelh zingah Deputy Commissioner, Lunglei District; Director, School Education leh Higher & Technical Education; Secretary, District Council & Minority Affairs, Horticulture, Land Resources, Soil & Water Conservation, Disaster Management & Rehabilitation leh Tourism-te a tel bawk.

Tunah hian an chhungkuain Chawnpui veng, Aizawl-ah an cheng mek a ni.