Aizawl April 9, 2023 : Nimin khan Congress Thalai Hqrs., Mizoram Pradesh Youth Congress Committee (MPYCC) chuan Assam Rifles Hqrs. Mizoram Range Khatla, Aizawl-ah Zokhawsang leh a chhehvela lo neitute harsatna tawh mek chu an thlen a, Assam Rifles hotute chuan a rang thei anga lo neitute harsatnate sutkian nghal an tum thu an hrilh.

Zokhawsang leh a chhehvel ram - Sedaikawn, Ramthazawl, Khuangkhaului, Phivawklui, Lallozawl, Changelzawl, Aharram, Sangabawk leh Bulpui zaua lo neitute hian hunrei tak ata Zokhawsang ram hi feh kawng atan an lo hmang tawh thin a. Zokhawsang hi Assam Rifles Lakhimpur Battalion ten an awmna tura an cheibawl tak avangin feh kawng hi hman chhunzawm an phal lo va. Lo neitute mi eng emaw zatin tunah hian harsatna an tawk mek a, chung an harsatna tawhte chu MPYCC chuan Assam Rifles thuneitute hnenah an thlensak a ni.

Lo hal zawh thlai chi thlak lai, lo neitute tana hun pawimawh a nih avangin MPYCC ngenna ang hian Assam Rifles thuneitute chuan thla hnih vel chhung chu ruahmanna an lo siam tur thu an sawi a. Battalion pakhat hmun tur a nih avangin hun rei tak erawh an camp paltlang hi a remti dawn lo a ni. 

Hetiang a nih avang hian MPYCC chuan Mizoram sawrkar chu lo neituten harsatna an tawh chhunzawm loh nan ruahmanna a rang thei ang bera siam turin an ngen a. MPYCC chuan Zemabawk leh Zokhawsang chhehvela lo neitute thlavang hi hauhin hma an lak zel tur thu an sawi.

Assam Rifles Hqrs Mizoram Range DIG Brig. Girish Upadhya chu a zin bo avangin 2nd in Command/ GSO1 Maj. Amit Yadav chuan MPYCC te hi a lo dawngsawng a, MPYCC hi President Dr. Lalmalsawma Nghaka hovin office bearers te kal a ni.