Aizawl: Mizoram Pradesh Youth Congress Committee (MPYCC) hruaitute chuan nimin tuk khan an President Dr. Lalmalsawma hovin Chief Minister Lal Thanhawla chu a bangla-ah an hmu a, Remna Ni pualin zahna leh chawimawina chibai bukin pangpar an hlan. Dr. Lalmalsawma chuan, “Mizoramin remna leh muanna kan neih theihna tura Pu Lal Thanhawla inpekna hi a fakawm tak zet a. Khawvel hmundangah remna atana an lalthutthleng kian sawi tur an awm loh laia lalthutthleng a kian hi a ngaihsanawmin a ropui em em a. Thangtharten a inhlanna hi kan ngaihlu a, kan la ngai hlu chho tulh tulh dawn a ni,” a ti. MPYCC President chuan, “Remna hi a hlu a, tunlai khawvel hmanhmawh tak leh changkang tawh takah hian, bus emaw sumo seat mai maite pawh kan inkian hlei thei tawh lo a. Chutih laia Zofaten remna leh muanna kan neih theih nana Chief Minister thuthleng kian thei hruaitu kan nei hi a ropui a ni,” a ti bawk. Chief Minister Lal Thanhawla te nupa chuan remna atana a inhlanna zah a, amah chawimawitu thalai hruaitute hnenah lawmthu a lo sawi a ni.