Aizawl April 16, 2023: Nimin zing khan Congress Thalai Hqrs., Mizoram Pradesh Youth Congress Committee (MPYCC) huaihawtin karleha Local Council Bye Election neihna tur veng 2 - Zemabawk leh ITI-ah Street Campaign an nei. Lalrindika Ralte, MLA & Gen. Secretary MPCC ; Lalhriatrenga Chhangte, Secretary, MPCC ; AMC Councillor Rosiamngheta ; Zodingpuii, Treasurer Mahila Hqrs ; Dr. Lalmalsawma Nghaka, President MPYCC leh Vanlalawmpuii Chawngthu ten thu an sawi.

Lalrindika Ralte MLA chuan Politics hi ram siamna tur a ni a, ram leh hnam hmasawn tir hi kan tum ber ni se a duh thu a sawi a, politics hmang hian mipuite awlsamna kawng thlen tur a ni, a ti. Local Council nghelnghet leh hmantlak a awm theih nan Congress party candidate te vote tura mipuite sawmin, "Pathian tihna nen lo chuan tumah tha zo kan awm lova, kan ram leh hnam zahawma siam turin kan theihna sang ber I hlan ang u," a ti.

MPYCC President Dr. Lalmalsawma Nghaka chuan, tuna political party Leader te zingah MPCC President Lalsawta chu kutfai ber leh mi dik, ram siamthatna kawng experience nei tha tih chu mipuite hriat dan sa a ni, a ti a, hnathawk theia siam turin mipuite thlawpna a ngen. "Party thenkhat ten ‘That loh theih lohna bawm’ hi lo nuihzat thin mah se, Pu Lalsawta hian mi fel famkim a ni bik lo tih inpawm ngamin system tha hmanga sawrkar tha min siampui a tum zawk a ni. Congress Party hian mi lar, mi ropui leh mi hausate tha chakna hmangin sawrkarna siam hi kan tum lova. Mi te ber te leh mi rinawm te nena tangkhawmin sawrkar tha hi siam kan tum zawk a ni," a ti.

Lalhriatrenga Chhangte, Secretary MPCC chuan, "ZPM ten kalphung thar zuar turin kalphung hlui an nei lova. Sawrkarna la chelh ve lo a nih avangin a taka tihhlawhtlin theih loh tur an tiam zel a, rin ngam an nih loh avangin mipuiten kan enchhin sual ang tih ka hlau. State sawrkar enkawl hi in enchhinna leh han ti ve chhin teh se intihna chi a ni lo. Mizoram mipui nuai 12 chuang nitin khawsak nun  khawih pha a ni," a ti.

Vanlalawmpuii Chawngthu, Ex-Minister leh Mahila Hqrs President chuan, "Congress party chungchang sawiin ram leh hnam tan kan theihtawp lo chhuah thin mah ila tihfuh tawk loh kan neihah mipuite leh Kohhran hote ngaihdam kan dil a. Mi dik leh rinawm Pu Lalsawta hovin sawrkar tha siam turin kan insiamtha mek zel a ni," a ti.

April 19, 2023 khian Zemabawk Local Council-ah seat 7, ITI veng leh Durtlang-ah seat 1 ve ve thlan tur a ni.