Aizawl August 2, 2023: Vawiin khan Mizoram Rural Bank Chairman thar Sheryl L. Vanchhong chuan Governor Dr. Hari Babu Kambhampati chu Raj Bhavan-ah a hmu a. He hunah hian Mizoram mipui ten awlsam leh tangkai zawka Bank an hman theih dan tur te, Bank Branch la awmlohna hmuna Banking service pek theih dan tur te an sawi dun.  

Larsap chuan Mizoram Rural Bank chu Mizoram chhunga Bank inzar pharh zau ber anih avangin midangte tana awlsamna thlen thin tu anih thu a sawi a. Nitina eichawp zawng te leh khawsak harsa zawkte dinhmun khaichhuah a nih theihna tura Sawrkar laipuiin ruahmanna a siamte nasa zawka tihhlawhtlin a pawimawh thu leh Sawrkar Department hrang hrangte leh Bank tangkawpin tihhlawhtling thei se a duh thu a sawi a. MRB chu ram hmasawnna thlentu leh chumi atana thawktu pawimawh tak ni zel turin duhsakna a hlan a ni. 

MRB Chairman pawhin an hmalak mekna leh an thlen chinte a tarlang a. Sawrkar laipuiin a ngaih pawimawh em em PMJDY Account chu Branch zawng zawngin an hawnsak theih thu te, khawl hmang uar tura inzirtirna (digitization initiative) ah pawh a thawhhlawk ber Bank an nih thu te, mipuite mamawh phuhru zel tura an Bank an inhawn thu te a tarlang bawk. Larsap in rawtna a lo siamte pawh a remchan ang zela tihhlawhtlin an tum tur thu a sawi bawk a ni.