ZALEN, Oct. 27, 2024: Kawng rualrem lova India ram pum huapa bike intlansiaka inelna, MRF MoGrip Supercross National Championship Round 3-ah Mizo tlangval, Shaun Lalremruata Chhangte chu pahnihna niin dawhsan (podium) a lawn phak.

Bhopal, Madhya Pradesh-a Pathiannia national championship neihah hian College Veng, Aizawl tlangval hian category pathumah inelna hmachhawnin Private Expert huangah pahnihna a ni a, inelna a hmachhawn hmasak berah dawhsan a lawn phak nghal a ni.

Shaun-a hi a mi mala (private)-a tel a ni a, Mizoram atanga hetiang inelna a tel hmasa ber leh tel awmchhun a la ni.

National championship Round 4, 5 leh 6 intihsiak a la awm leh dawn, hemi hmachhawn tur hian Shaun-a hi a inbuatsaih mek a. Panchgani, Maharashtra; Bengaluru, Karnataka leh Cochin, Kerala-ah te neih leh tur a ni.