July ni 16, 2022 Inrinni zan khan Mizoram Super League, season 7 Final Game 3 chu Zarkawt BCA leh Khatla TBL ten an khel a, champion lai Zarkawt BCA 81-73  a chakin an champion. 

Final hi best of three hmanga khelh niin Game 1-ah Khatla TBL hian 87-65 in Zarkawt BCA hneh a, game 2-ah Zarkawt BCA chuan 78-68 in an hneh let leh. Nizam Game 3 khelhah Zarkawt BCA chuan hnehna changin a vawili nan champion nomawi an hawn. 

Champion Zarkawt hian trophy leh cheng 2,20,000 an dawng a, pahnihna Khatla TBL hian trophy leh cheng 1,10,000 an hlawh chhuak thung. Pathumnaah Mission Veng Hotshots awmin palina Tuikual South BC an ni. League khelh chhungin Zarkawt BCA foreign player Joseph Allen chu Most Valuable Player atan thlan a ni a, Khatla TBL player Michael Liansanga chu Defensive Player of the League-ah thlan a ni a, Lalrozama, Mission Veng Hotshots chu Rookie of the League hlan a ni bawk. Chanmari Vikings team chuan Fair play award an hum haw thung. 

Team hnih inhnehtawk tak te hi Game 1 leh 2-ah an chak tawn ve ve theih avangin game-3 ah pawh hian team vannei zawk zawk-in champion trophy an chawi dawn tih a chiang. Final zan hnuhnung ber a ni tih hriain, coach chuan an that dan tur berin first five an set a, an foreign player an luh tir ve ve. Bul an tan tha ve ve a, Zarkawt BCA an chungnung hret zawk. quarter khatna hi BCA chuan 23-22 in an la a, quarter hnihnaah pawh point khat chiaha sang zawkin 20-19 in an la leh thei hram.

Point hnih a hmahruaiin Zarkawt BCA lamin chawlhlawk an hmang. Basket khat chauh a hma hruai an nih vangin BCA lam tan thlamuanga awmna chi a ni lo, TBL lam tan pawh hnualna tur a la awm lo. 

Third quarter an tan leh a, Zarkawt BCA lamin chawlhlawk an hmang tangkai zawk tlat mai. point hniha hma hruai belhin 18-16 in hnehna an chang, fourth quarter-ah pawh Khatla TBL lam an insiam rem hleithei lo, Zarkawt BCA lam an khel tha tulh tulh thung a, 20-16 in hnehna an chang lehin a pumpuiah 81-73 a chakin hnehna an chang ta.

League-a parukna Chawnpui BC te hi season leh atan MSL atangin an relegate-a, division 1 atangin club pahnih Khatla South Barons leh LB Associates Bungkawn ten MSL an rawn kai thar thung ang. Club paruk chauhin-a an khelh thin MSL hi season tharah chuan pariat-a tih len a ni tawh dawn a, tun season-a 1-5 place hauhtu club bakah division 1 atangin club pahnihin an rawn belh thung ang. Club pakhat tana hmun ruak awm chu District Basketball Association quota atan dah a ni a, July thla tawp lam hian District pasarih atangin club ten an inchuh dawn a ni.

Zarkawt BCA
Lalrina Renthlei - 19pts, 5 rebounds
Joseph Allen - 14pts, 20 rebounds
Zonunsanga - 22pts, 5 rebounds

Khatla TBL
K Lalthianghlima - 11pts, 11 rebounds
Levi Bradley Jr - 21pts,6 rebounds
Vanlalthazuala - 15pts, 8 rebounds

Total Period 1 Period 2 Period 3 Period 4
Zarkawt BCA :  81-23-20-18-20
Khatla TBL :     73-22-19-16-16

Lawmman:
Champion: Zarkawt BCA, cheng 2,20,000.00
Pahnihna: Khatla TBL, cheng 1,10,000.00
Pathumna: Mission Veng Hotshots, cheng 55,000.00
Palina: Tuikual South BC, cheng 50,000.00
Pangana: Chanmari Vikings, cheng 40,000.00
Parukna: Chawnpui BC, cheng 35,000.00

Mimal lawmman:
Most Valuable Player: Joseph Allen, Zarkawt BCA
Defensive Player of the League: Michael Liansanga, Khatla TBL
Rookie of the League: Lalrozama, Mission Veng Hotshots
Fair Play: Chanmari Vikings