Mizoram Super League khelh mekah nizan khan final Game 2 ah Zarkawt BCA leh Khatla TBL inhmachhawnin Game 1 a chaklo zawk Zarkawt BCA chak ve thungin Inrinni zan dar 8:30 khian final tak tak kan hmu dawn. 

Game 1-ah khan Khatla TBL hi 87-65 in an chak a, nizan lamah Zarkawt BCA lam 78-65 in an chak ve thung. Inrinni zan khian MSL a tiak tawh dawn a, club tha pahnih-a chak zawk zawkin nomawi an hawn tawh ang. 

Champion lai BCA leh Champion hmasa ber TBL hi league round-ah tum hnih inhmachhawn tawhin vawikhat ve ve an in hneh tawh a, final game 1 leh 2 ah tum khat ve ve ang chak tawh bawk a, chungnung bik an awm lo. Eng team zawk zawk pawhin nomawi chawi se vannei zawk tia chhir theih an ni ang.  

Nizan inkhelah hian team pahnihin bul an tan tha a, chak nawn tum Khatla TBL an khel tha a, champion tum Zarkawt BCA-in tlawm an tum tawh bik lo. First quarter-ah 21-20 in BCA lamin hnehna an chang hram. Second quarter-ah TBL an che nawi deuh a, 24-14 zetin Zarkawt BCA lamin ro an rel zui. 

Chawlhlawk an hmang a, quarter thumna hi team tawn tawnin an khel tha lo hle a, Zarkawt BCA hi point 14 bak an thun thei lo va, Khatla TBL lam lahin point 7 chiah an thun. Fourth quarter-ah Khatla TBL an rawn tang thar a, 24-19 in quarter an rawn laa, mahse hun hmasa lama an luh theih loh tuarin Zarkawt BCA an hneh zo ta lo. 

BCA lamah an foreign player Joseph Allen leh Lalrina Renthlei an chetha a, Allen hian point 23 leh rebound neiin Lalrina hian point 22 a thun bawk. Khatla TBL lamah pawh a foreigne player Levi Bradley Jr. chuan point 38 a hlawh chhuak a, a team mate zingah point 10 score thei an awm lo thung.  

Total Period 1 Period 2 Period 3 Period 4
Khatla TBL :65-20-14-7-24 Zarkawt
BCA :78-21-24-14-19