ZALEN July 26, 2026: Mizoram State Project Monitoring Committee (MSPMC) chuan Directorate of Economics & Statistics department building sak hna thawktu chungah a tul anga hremna dan lek ngei tul an ti a. Building sak hun laia department-ten hnathawh enpui kawnga an mawhphurhna an hlen loh avangin a tul anga disciplinary proceeding tih ni se an ti bawk.

MSPMC report tar lan danin Directorate of Economics & Statistics department building hi North East Consultancy Services Pvt. Ltd. (NECS) chuan kum 2013 khan sa tanin November 22, 2016-ah chief minister-in a hawng a, building hian chhawng 10 a nei a ni.

Hmun duhthawh thilah kum 2021 khan a chhawng ruak, Basement IV chu a bang pina DRO Office atan siam rawt a ni a, a building rinawm dan endik turin MPWD ngen an ni. 

Quality Control, Research & Development Division, PWD ten May 19, 2022 khan endikna an nei a, a ban leh beam te chu an chak zawng tur tling lo vek an ni tih hmuh chhuah a ni a. DPR/Specification ang chuan concrete chak zawng hi M20 Grade tling tur a ni a, test result atanga a lan danin M10 Grade hnuai lam vek an ni zawk a. Building hi a chak lovin a derthawng hle tihna a ni a, chim rup thei a ni tih chu mi thiamte hmuh dan a ni. 

Building hi thiat chiam lova thawm chak (retrofit) tura hma lak a ngai hle tih chu endiktute thutawp a nih avangin a building chhan nana mi thiamten a tha ber tura an ngaih chu structural retro-fitting (jacketing) neih a ni a. Sawrkar atangin sum an dil chu pek an nih hnuah building ban leh a nghahchhan tihchak hna hi April, 2025 atangin MPWD-in contractor ruaiin a thawk mek a ni.

MSPMC-in an zir chiannaah building sak nan hian Rs. nuai 203 pek a ni a. June 9, 2026 khan MSPMC Inspecting Team chuan building chei that hnathawh mek hi a tlawh a, building hi turnkey-basis in sak a ni a; a luahtu tur directorate hi a sak chhung zawng hian an inrawlh lo niin a lang.

Turnkey pawh ni se a hmangtu turin ‘thu leh hla’ neih miah lo leh enpui loh hi project pawimawh kalpui dan tur a ni lo va. Building sak zawh inhlan dawnah document pawimawh inventory inhlan chhawn pawh engmah a awm lo. 

Contractor-in a duh dan danin a sa a, sak man bill pek dawnah teh emaw, endik emaw pawh ni loa sum pek chhuah tawp niin a lang bawk.

NECS structural drawing a ruahman ang hi retro-fitting hna thawh dawna a foundation/footing laih lan a nih hian heng a nih dan tur uluk taka duan lawk, specification hi a tling lo vek tih hmuh a ni a. Ban thenkhat chuan foundation/footing mumal pawh a nei lo a. Retro-fitting work khawih hnu, June 8, 2026-ah test leh niin a tira a chak zawng M10 tling lo kha M25 a tling tawh tih hmuh a ni.

Office building sak hi building derthawng a nih avanga a building chhan nan structural retro-fitting hian a nghawng nasa a, loh theih lohva tihchhiat leh siam that ngai a tam hle.

He building hi an sak zawh leh an luah atanga kum sawm vel emaw chauhah a ban zawng zawng leh beam te heti taka a chakna a tlak hniam thutna chhan chu he building sak lai hian hmanrua leh a sak danah contractor te hi an inthlahdahin hna thawh dan dik leh specification tling turin hna an thawk tha tawk lo ni berin a lang a. Contractor hian Design & Specification ang ngeiin hna hi a tir alanga a tawp thlengin a thawk lo a ni tih phat rual loh a ni tih an tarlang. 

MSPMC in rawtna an siam ang chuan building project hna thawhah hian public sum tam tak luan ral tir a ni a, thawm that leh nan sum tam tak sen ral leh mek a ni. A hun laia sawrkar Department hian hnathawh enpui kawnga an mawhphurhna an hlen lohzia a tarlang chiang hle a. Mahni hna leh mawhphurhna ngaihthah a ni hi a pawi em em a, a tul anga disciplinary proceedings tih ni se. Turnkey basis a hna thawktu, sawrkarin 'rintlak' tura a ngaih, rinawm zui lo chungah pawh a tul anga hremna dan lek ngei a tul ang tiin he case hi thuneituten umzui ngei se an ti bawk.

Project chungchang 

Turnkey project-ah chuan contractor-in mawhphurhna zawng zawng, a ruaitu duh dan ang ngeia hna duan, estimate dik taka siam, project atana pawm theih chin quality standard tuka a bul tê atanga hna zawh thlenga hna atana tul zawng zawngte lakkhawm leh thawh a huam vek a ni. 

Agency/department atanga hna viltu an awm lo a nih pawhin hna chu specification leh quality standard zawm hi contractor mawhphurhna leh tih ngei tur a ni.

Contractor hian hman nghal mai theihin a ruaitu hnena a hlan thleng hi a mawhphurhna a ni. 

A ruaituin turnkey project thawk tura a ruat hi chu a ring tawka mawhphurhna pein belhchian dawl taka vil ngai lova thawk tura a beisei a ni thin.