ZALEN August 2, 2026: Mizoram State Project Monitoring Committee (MSPMC) chuan ZIDCO Ltd. hnuaia hnathawh mek, Luangmual-a Industrial Workers Hostel chu a building sak chinah concrete chak zawng bituk tur a tling lo vek nia sawiin mihring chenna atan a tlak lo niin an sawi.

MSPMC hian July 3, 2026 khan Commerce & Industries Dept. hnuaia ZIDCO Ltd. hnuaia hnathawh mek hi an endik a, an thil hmuh dan tar langin Industrial Workers Hostel building hna tan hma leh tun hun thlengin AMC atangin Site Development & Slope Modification leh building sak phalna lak a la ni lo tih sawiin Fire & Emergency Services atanga phalna lak ngai pawh lak a la ni lo niin an sawi bawk. 

Building sakna atan hian detail drawing a awm mumal lo a, bang pin dan tur, kawngkhar leh tukverh siam dan tur, inthiarna siam dan tur, a len zawng leh zau zawng (fitting schedule), etc. te hmuh tur a awm lo nia sawiin, “Heng item-te hi thawh tan an nih hmain fel fai tak neih ngei tur a ni,” an ti.

MSPMC chuan structure design tu Assistant Engineer hi ZIDCO Ltd. a an hotute thu angin hnathawh mek lai hi inspection nei tur pawhin a kal ngai lo tih sawiin third party monitor hna thawk tur hian MPWD te sawrkarin dah ngei se. Hei hi tih puitlin a nih loh erawh chuan hna quality finfiah loh, rin duap kai si chhunzawm zel tawh lo in he Project hi sawrkarin tih tawp dan a ngaihtuah mai se an ti bawk a. 

Work Programme leh Register pawimawh tak te hi he Project khawihtute hian an nei mumal lo a, hna thawh tawh chin quality pawh a tha lo tih an sawi a. Building sakna hmun hi Land Lease emaw, sawrkar atanga ram hman phalna emaw, ziaka notification emaw order emaw la awm lo hi a fel lo tih sawiin thla 2 chhunga tihfel ngei ni se. Room len zawng hi 3.65m x 3.65m a ni a, a lian lo hle a. 

Hnathawkte awmna tur a nih avangin hmun zau deuh leh hahchawlh theihna ni thei se. Hna 25% lai thawh tawh a ni a (ZIDCO lam phei chuan 31% niin an sawi), 'work done bill' erawh siam a la nih loh thu MSPMC hriattir a ni a. Bill hi contractor siam tur leh submit tur a nih rualin tun thlenga bill a la submit loh avangin, sum lama harsatna a nei a nih pawhin chhuanlamah a hmang thei lovang. Nakina hun pawhsei (extension of time) nawr nan hmantir loh tur a ni ang, an ti bawk.

MSPMC in project kal zel tura sawrkarin thutawp a siam tura rawtna a thlenah chuan he project hi a rang thei ang bera titawpin building sak sa hi thiat vek ni se, a thara uluk zawka din ni zawk se tih emaw building hna kaihruai thei tur structural engineer ZIDCO in nei se, building ban tlingło ho hi a tul na lai apiangah structural retrofit hmangin thuanchak leh se, quality control vilna leh endikna hnuaiah kalpui zel ni rawh se. Hetiang taka kalpui a nih chuan he project hi kaltlang tir ni se building pawh vuak chhiat ni lo se. Amaherawhchu, hemia senso zawng zawng hi contractor in ama sum hmanga a tih tur a ni a, sawrkar sum hmanna chi a ni lo ang, tih a ni.

Industrial Workers Hostel sak mek leh MSPMC hmuh dan kaihhnawih

* Building hi SASCI Part I (Untied Addl.), 2024-25 sum cheng vaibelchhe 4 hmanga thawh a ni a, Febraury ni 18,2026 khan work order pek chhuah a ni.

* Industrial Workers' Hostel, IGC Luangmual a sak mek hi RCC building chhawng li (G+3 Floors) tura design leh sanction a ni a. Room 29 vel awm tura duan a ni. He hna hi Restricted Tender hmangin G.I. Infotech, Zarkawt, Aizawl hnenah pek a ni a, mahse contractor hian a thawk lo niin a lang.

* Staircase plan hi a kimchang lo a, a mumal lovin a dik lo bawk. Staircase formwork siam hmain approved Architectural & Structural Drawings a awm ngei tur a ni. Tin, staircase landing concrete formwork atan dap (mau chik) hman an tum hi board khawng tha takin, concrete chhun hmain thlak vat ni rawh se. Staircase structural drawing section hi a riser (step san zawng) hian a chung chiah chhuat a thleng zo lo. 

* Toilet design ah hian Sunk floor buatsaih a ni lo a, toilet design mumal tak awm tur chuan pipe kalna tur pawh fel takin a ruahman tel tur a ni a, heng hi tih a ni lo. 

* Section drawing leh elevation drawing te hi a inmil lova, Elevation te siam that leh hnuah, specification mumal taka ziah felte nen a in mila siam that ngei tur a ni. Building elevation (front, side & back) ah 'professional touch' a awm lo. Aesthetic hi building lan dan a nih avangin a pawimawh hle, professional taka siam that ngei ngei tur a ni.

* Roof Plan hi slope roof a ang hle a, section ah eng material nge tih lan a ni lo. Hei hi tỉh chian a, chumi mil chuan dik taka section ah show that leh vek tur a ni. RCC slab roof ni zawk se a tha zawk ang.

* Mihring tam tak chenna tur in sakna atana thil pawimawh hmasa Architectural & Structural drawings kimchang lo leh duhdah taka siam hi hman zui chi niin a lang lo.

* Rora hi a sample la a test tawh a ni a, a tling lo a, a tlin loh dan kimchang pawh chhinchhiah a ni. Rora an hman hian tui a pawm tam hle, Standard Specification in a phal bak a ni. Rora len zawng in dawt dan (gradation) hi a tha lovin a dik lo nasa hle, concrete tha leh chak siam chhuah a harsa hle ang. 

* Balu hman hi a tha lo hle a, silt content a sang hle. A sang lama Standard Code phal chin 3% by weight a nih laiin an balu hman silt content chu 5.20% by weight a tling a. Balu hi a balin a dip lutuk bawk. 

* Steel rebar hi test report ah chuan steel rebar KAY-2 Xenox 500 hman a nih laiin a takah chuan KAMDHENU Nxt 500 hman a ni thung. KAY-2 Xenox 500 hi dimension (diameter) leh yield strength ah a tling lo ve ve.

* Cement hi Amritcem PCC hman a ni a, Test results/report pawh hmuh tur a awm lo.

* Ban chhun tawh sa 28 chu inspection neih ni hian Proseq Rebound Hammer (Non-destructive test) hmanga a chak zawng endik vek a ni a. A chak zawng bituk tling pakhat mah a awm lo.

* Steel rebar building atana a taka an hman hi kamadenu FE 500 a nih lain laboratory a test tir erawh chu KAY-2 genox FE 500 a ni daih thung a. Hei hi thil pawi tak inbumna thil a ni.