ZALEN October 26, 2025: Mizoram State Project Monitoring Committee (MSPMC) chuan kum khat kalta chhungin project 42 tlawhin an endik.

MSPMC-in annual report 2024-25 an tihchhuahin a tar lan danin January, 2024 atanga March, 2025 inkar khan project hrang hrang, district 10 chhunga 42 an tlawh a. Project kal lai mek an tlawh/endik tam zawk hi kum 4/5 vela hna tan tawh, zawh hun tur bituk pel tawh an ni tlangpui a. Heng project-te hi department 13-te hnathawh niin endikna tum 48 neih a niin heng an project tlawha sum senso tura ruahman chu cheng vaibelchhe 1,411.93 a ni.

MSPMC-in project a endikte hi a hmuna kala an endik mai duh tawk lovin an hmanraw hman leh an hnain kut a tling ngei em tih an finfiah zel a. Chutiang atan chuan Mizoram PWD-a Quality Control, Research & Development Division-te a hmunah kala a tul ang sample lain finfiahna an nei leh thin a. Hei hian hna tha lo laite hai langin a tul anga ti tha turin a nodal leh thawktu (executing) department-ah an hriattir leh thin a ni.

MSPMC-in hna hrang hrang a endiknaa report lakkhawm, zirchianna atanga thil chiang tak lang chu project khawtlai, a huna zawh loh tam tak hi a nodal department leh executing agency-in project chinchang, project management leh quality control pawimawhna an hriat tawk loh leh ngaih pawimawh tawk loh vang niin report-ah tarlan a ni a. Hei bakah contractor ni lo, contractor hming hmanga hnathawkten professional experience an neih loh bakah quality an hre lovin an ngai pawimawh lo a. Hei hi hna tha lo tam tak awm chhan niin report-ah hian tar lan a ni bawk. 

April 1, 2025 atang chuan sawrkar project sanction thar reng reng cheng vaibelchhe nga chin chung lam chu MSPMC-ah hriattir thin tawh turin sawrkar chuan notification a tichhuak a, sawrkar kum thar atang chuan a bul atanga vil tanin quality tha zawk leh a hun taka zawh ngei tuma tan lak leh zual an tum a ni.

MSPMC hi January 22,2024 khan din tan a ni.