ZALEN September 23, 2025 : MSSC Golden Jubilee 44th Mizoram State Boxing Championship 2025 neih turah Mizoram Boxing Association (MIZBA) in Serchhip Dist. Boxing Assn.-in Hmeichhe Boxer 3 an hruaite Championship khelh ve an phalloh thu kal zelah Mizoram State Sports Council chuan MIZBA chu insawifiah turin a ti.

Mizoram State Sports Council chuan MSSC Golden Jubilee 44th Mizoram State Boxing Championship 2025 Lunglei-a khelh mekah POCSO case-a tuartu (victim) hmeichhe boxer te khel ve an phal lo a puhna chungchanga Child Welfare Committee (CWC), Aizawl District atanga hriattirna an dawn bawhzuiin he inpuhna thu diklo a ni emaw, chhan tha tak avanga khelhtir phallo an nih chuan insawifiah turin an ti a ni.

Sports Council chuan insawifiahna an neih hma chu Mizoram Boxing Association in an buatsaih mek MSSC Golden Jubilee 44th Mizoram State Boxing Championship 2025 chu titawp ngal turin an hriattir a ni.