Aizawl; Kum 5 chhunga (2008-2013) Transport Deparment hnathawh thlirletna-ah hmasawnna tura chhawp thenkhat chu bawhzui a ni lem lo niin tarlan a ni a, inrelbawlna senso sang lutuk tihhniam nana privatisation policy hman leh MST bus service hlui a thara thlak a rel te pawh tihpuitlin lohin a la awm a ni. Comptroller and Auditor General of India (CAG) tarlan danin Bus hlui hman tlak mang lohte chu a thar thlak tumte chu thlak an nih loh avangin department chuan sum a chan zawk niin a sawi a. MST bus service tir chu August 2008 - March 2013 inkar khan 53 atangin 33 ah a tlakhniam avangin nitina bus 'service operation' chuan hma a sawn loh phah a ni. 'Tunah hian tan kan la mek a, bus 2 chu kan lei tawh a, a lo thlen tep kan beisei a ni. Public service kan nih angin motor dang tlan duhlohna hmunah kan tlan a ngai thin a, kawng a lo chhia a motor a tlo rei thei lo hle a. A hlawkna ni lovin public service pek kan tum vang a ni,' tiin Lalzarliani, Director Transport chuan a ZALEN a hrilh. Mizoram State Transport lirthei enkawl nan Rs 67.54 zel kilometer 1-ah (2008-2009) a seng thin a, 2012-2013 kha chuan Rs 191.41 per km-ah a chho tawh a ni. Hnathawk chhawr man a to em avangin October 2009 khan state planning board chuan department chu tihniam tura hma la turin a rawn tawh a, February 2014 thleng khan hmalakna a la awm hrih lo nia tarlan a ni bawk. 'Mihring chhawr nana sum sen tlem hi Mizoram-ah chuan a har khawp mai a, labour rate a sang si a, driver te pawh sawrkar hnathawk an ni a, TA thlenga kan pek a ngai thin si a, sum sen a hautak duh hle' tiin Director chuan a sawi a, CAG sawiselna chu CAG hnen ah a chhanna an thehlut tawh niin Director chuan a sawi bawk. Department pakhata awm thin Supplies and Transport hi ni 20th Dec 1987 khan deparment pahnih-ah then hran a ni. Mizoram chhung leh pawna khual zin vei vakte man tlawm zawka phur turin Mizoram State Transport hi din a ni.