ZALEN Sept. 25, 2025 : Mizo Students’ Union (MSU) General Headquarters, Aizawl hruaitute chuan Ninganiah khan Home Minister K. Sapdanga chu a pisaah an hmu a, Sairang thlenga rel a lo luh tak avangin ILP check point thuam chak a tichangtlung turin an ngen.

MSU hruaitute chuan Mizoram chhung, Sairang thlenga rel a lo luh tak avangin hnam dangten min chim nasa dawn tih an sawi a. Mizo mipuite kan him tlan zawk nan Inner Line Permit (ILP) check point thuam chak a, tihchangtlun a nih theih nan hma la turin Home Minister chu an ngen a. Sairang thlenga rel lo lut turah hian Sihhmuiah chauh ni lo, Sihhmui leh Phunchawng inkarah ILP khauh taka check a nih theih nan ILP check point siam turin an ngen a ni.

ILP check point ni lo, a ruka lo lutte an awm theih venthawn thilah Serkhanah pawh ILP check point a awm theih nan hma lakpui tura an ngenna chu K. Sapdanga chuan tha a tih thu leh hma lak a tum thu a lo sawi a ni.

Mizoram rawn tlawhtu khualzinten ILP kalphung mumal leh tha zawk an neih theih nana hma la turin MSU hruaitute hian Home Minister chu an ngen a. Tourist te tan bika hman theih tur Tourist ILP a hranpaa duan a nih theih nan Temporary ILP kan neih mek chu ennawna siam that a nih theih nan an ngen bawk a. Home Minister pawhin Tourist ILP chungchangah hian Tourism Department changtu Minister chu rawtna an neih theih nan sawipui a tum thu a lo hrilh a ni.