Aizawl February 3, 2023: Mizo Students' Union (MSU) General Headquarters, Aizawl chuan Federationof Mizoram Government Employee & Workers (FMGE&W)-in sawrkar hnathawk pension hun kum 60 atanga kum 62-a tisang tura sawrkar an nawrna chu ram dinhmun an thlirna atangin dodal an tum.

Vawiin khan MSU chuan an Pisa Pui, President Chamber-a Extended OB Meeting a nei a, "FMGE&W-in an General Conference -a an lo rel tawh Mizoram Sawrkar hnathawkte pension hun kum 60 atanga kum 62-a tihsan tura sawrkara an dilna chu ram leh hnam, sum dinhmun te thlirin leh zirlai thalai hna hmuhna kawng thui taka a dan thin avangin MSU chuan retiring age kum 62 a tihsan hi tha a ti lo hle a, MSU chuan kan ram dinhmun thlir chungin a dodalna Mizoram sawrkar-ah thlen ni se," tiin an rel.

MSU Meeting hian, Mizoram sawrkar-in sawrkar College-a Under Graduate leh Post Graduate a course thar a hawnah zirtirtu dah a ni em tih leh zirtirtu an indaih em tih zirchianna neih nise tiin an rel bawk. 

Govt. Champhai College-a Commerce building RUSA hnuaia sak mek, kum 2019-a sak tan tawh, a sakna tur sum awmsa vawiin thlenga sak zawh a la ni lo chu MSU chu pawi an tih thu an sawi a, hna khawihtu company te leh sawkar chu a ranglama hna thawh zawh loh awm te thawk zo thuai turin an phut a, Govt. Champhai College-a Commerce subject building sak mek chu an thlithlai reng dawn tih meeting-ah hian an sawi bawk.