ZALEN January 19, 2026 : Mizoram Youth Commission (MYC) kaltlanga India rampum Lehkhabu Chhiar inelna (Reading Decathlon) a tel School pahnih - Mt Carmel, Chaltlang leh La Montessori, Mission Veng chu 2-na leh 3-na dinhmun an hauh a ni. He inelna hi Food4Thought Organisation leh Monocept te tangkawpin an buatsaih a ni a, inelna hi quiz round hrang hranga neih a ni. Inelna hi level thum ah kalpui a ni a, State level, Regional level leh National level a kalpui a ni.

State level inelna hi August 22, 2025 khan MYC in an hmunah a lo buatsaih tawh a, School pali an tel a, School tin hi zirlai naupang pahnih zelin ai an awh a ni. He inelna ah hian Mt Carmel chu pakhatna an ni a, Krista Roluahpuia Khiangte Class IX zirlai leh Rebek Malsawmzuali Class VIII zirlai te an tel a ni. La Motessori hi pahnihna an ni a, Malsawmhlui Pachuau Class VIII zirlai leh Joshua Lalawmpuia Class VIII zirlai te an tel a ni. State level round ah hian lehkhabu 50 chuang chhiar tur pek an ni a, hemi atang hian zawhna an chhang a ni.

Heng School pahnih te hi Regional level atana thlan an ni a, November 29, 2025 khan Indore, Madhya Pradesh ah Mizoram aiawhin an tel. Regional level hi zone 5 a then a ni a, school 21 (sawmhnih pakhat) an tel a ni. Regional level ah hian Northeast Region ah La Montessori hi pakhatna an ni a, Mt Carmel School hi pahnihna an ni thung. Regional Winner te hian National level ah Northeast Region ai an awh ta a ni. Regional level ah pawh hian lehkhabu 50 chuang hret chhiar tur an bituk bawk.

National level ah hian School 10 an qualify a January 17, 2026 (Inrinni) ah Hyderabad ah neih a ni. He National level hi Mizoram aiawh te hian flight cancel vangin a hmun ah an tel theilo a, Organiser ten online a tel an phalsak ta hlauh a, MYC office atangin national level competition ah hian an tel ta a ni. Zing dar 8 atanga neih tan niin tlai 5:30 ah zawhfel a ni. He inelna ah hian avaiin lehkhabu 100 chuang hret hmanga inel a ni a, Mizoram aiawih School Mt Carmel atanga tel pahnih- Krista Roluahpuia Khiangte Class IX zirlai leh Rebek Malsawmzuali Class VIII zirlai te chu pahnihna (2nd place) dinhmun an hauh a, La Montessori atanga tel pahnih - Malsawmhlui Pachuau Class VIII zirlai leh Joshua Lalawmpuia Class VIII zirlai te chuan pathumna (3rd place) dinhmun an hauh bawk a ni.

Mizoram Youth Commission chuan india rampum inelna- lehkhabu chhiar inelna hautak zet mai a Mizoram aiawh school pahnih te a lawmpui hle a, an thawhrimna leh inpekna ropui a tiin hei hian Mizo thalaite ah nghawng tha a neih ngei a beisei a ni.

He Reading Decathlon hi kumtin buatsaih thin a ni dawn a, inelna neih a nih leh dawnah school tam zawk an tel theihna hriattirna zauzawkin MYC chuan ati chhuak zel thin dawn a ni.