November 1, 2023; Mizoram ṬKP rorel vawi 69-na thu pass ‘Mizoramah tun aia rorelna dik a awm theih nan MṬKP-in hma la rawh se’ tih bawhzuina pakhat atana Awareness Video Clip pathum MṬKP-in a buatsaihte chu Ni 31.10.2023 (Thawhlehni) zan khan BCM Hall, Serkawn-ah BCM General Secretary, Rev. R. Lalbiakliana’n Pathian hnena hlanna leh tlangzarhna a nei.

He hun hi MṬKP Secretary Rev. F. Zorinkhuma’n kaihruaiin, Rev. R. Lalbiakliana, General Secretary, BCM chuan Video clip hlanna leh tlangzarhna hun a hmang a. Rbt. Joseph B. Zirsangzuala, Secretary MṬKP Media Cell in Rorelna dik chungchanga MṬKP leh Media Cell hmalakna tlangpui report a pe bawk.

Heng Video clip te tlangzarh tak te hi hi MṬKP aiawhin MṬKP Media Cell; ṬKP Trinity Unit, Zobawk North; ṬKP Venghlun Unit, Lunglei ten an buatsaih a ni.

Mizoram ṬKP chuan, ‘Mizoramah tun aia rorelna dik a awm theih nan MṬKP-in hma la rawh se’ tih thu bawhzui hian Ni 20th August, 2023(Pathianni) tlaiah Mizoram chhung leh pawna Unit zawng zawng te Chawnghei ṭawngṭai an nei a. October ni 9 leh ni 10 khan MṬKP hruaitu te chuan Mizoram Political Party hrang hrang 5 te Headquarters tlawhin an hruaitute nena inkawmhona hun an neih bakah an tana ṭawngṭai sakna hun te an lo hmang tawh bawk a ni.