Aizawl: Mizoram Truck Owners Association (MTOA) leh Mizoram Truck Drivers Association (MTDA) ten NH 54 kawng chhia avanga October 17, 2019 (Ningani) zing dar 7:00 atanga lirthei veivak an dan chu nimin tlai dar 4:50 khan an titawp.

Mizoram Truck Owners Association chuan thuchhuah siamin kawng an dan chhunga thlawptu zawng zawng te chungah lawmthu an sawi a, an din chhunga eibar leh ni tin mamawhah Mizoram mipuiin harsatna an tawk a nih chuan hrethiam a, ngaidam turin an ngen tih an sawi.

MTOA leh MTDA te hian Kawnpui leh Rangvamualah truck veivak tur hi an dang a, Kawnpuiah hian nimin tlai thleng khan truck 200 vel a ding niin Zalen chuan thu a dawng a, kawng dan vang hian harsatna thleng a awm hriat a ni lo.

NH 54 kawng chhe zual lai Buichali-Khamrang inkar chhe siam hna hi Ratna Infrastructure Project Pvt.Ltd. Hyderabad chuan an thawk mek a, ni 2/1 hnuah chuan a khuar chhe zual lai chu hnawh theih an beisei. Khamrang-Kawnpui hi PWD-in an thawk mek a ni.