Aizawl; N.F Railway Line (Bairabi - Sairang) in Mualkhang Village Council huamchhunga mimal ram a sut tur endik ni tura a lo ruat tawhte chu Lok Sabha MP Election nen a intih buai avangin endik hun sawn a ni a, April ni 15, 16, 21, 22, 22 leh 23-ah sawn a ni. Heng ni ruatah hian ram neitu dik tak te chu an Pass nen an ram inrina atanga endik tan a ni dawn a, endik ni apiangin zing dar 9 leh tlai dar 4 chhungin endik hna hi thawh thin a ni dawn tih Kolasib DC, Jitender Yadav chuan a sawi. Mualkhang VC huamchhunga Bairabi - Sairang Railway-in a tihchhiat tur ram neia insawite ram hi April ni 11-a teh tha turin sorkar lam chu a inpeih tawh a, Rail kawng kalna tur ram sir vel pawh kal mai theih turin NF Railway lamin an tifai vek tawh bawk niin thudawnna chuan a sawi. Bairabi - Sairang Rail kawngin a tihchhiat tur Bairabi VC huamchhunga ramneitute hnenah hian Rs.7,21,002,422/- pekchhuah a ni tawh a, Kawnpui VC huamchhungah 17,01,51,365/- pek-chhuah anih tawh bakah Hortoki VC huamchhungah Rs.17,1,48,003/- pekchhuah a ni tawh a. Khamrang VC huamchhunga ramneitute hnenah Rs.9,75,17,250 pekchhuah a ni tawh bawk. Mualkhang VC huamchhunga ramneitute hnenah hian Rs.16,04,00,847/- pekchhuak tura ruahmanna siam fel a nih tawh hnu ah, diklo taka zangnadawmna lak tum a awm nia hriat a nih avangin ACB-in chhui a, Mualkhang ramah hian VC Pass nei, a taka ram nei silo nia rinhlelh mi 49 awm ngeia hriain teh that a ni dawn ta a ni.