Aizawl February 24, 2023: Vawiin chawhnu khan ZPM chuan Directorate of Transport bulah ‘Ram hmasawnna chhuanlama, sum siamna atana hmang thin sawrkar rin zawh lohna punkhawm’ an huaihawt a, He huna thusawitu K Sapdanga chuan mualphona tawpah pawh mi dang ngaidam thei Leader Laduhoma an nei chu lawmawm a tih thu a sawi.

ZPM Working President K Sapdanga chuan, “ZPM Legislature Party Leader leh Sports Minister an inhnial pawtawk palh a, an thu inchuh thelh nan speaker-in dawt sawi zawk chuan ngaihdam dil turin a chalrem a. ZPM leader chuan a thu dawn kha a sual palh zawka hriain, house zahawm takah leh ram mipuite hriatah ngaihdam a dil a ni. Kan Leader hi dik lo nia a hriatah dawt phuahchawpa tan tlat a tum lo a, huaisen takin ngaihdam a dil a ni. Mualphona vawrtawp khum chunga khingpuite dik lo zawk pawh ngaidam thei Leader Pu Lalduhoma kan nei hi kan lawm a, kan chhuang tak zet a ni,” a ti. 

Sapa chuan, “Khaw tam takin phullem phah ngat khelmual kan nei a, mipuite kan lawm em em a; mipuite aia a let tam taka lawm zawk hi an lo awm a, chung mite chu Consultancy Firm te, Contractor-te an ni. Heti taka sports hmasawnna atana hna thawk thaa kan inchhal lai hian, mangang em em pawl an lo awm reng mai a, chung mite chu infiammi te leh anmahni enkawltu Sports Association te an ni. Kan Chief Minister leh kan Sports Minister ten cheng vaibelchhe chanchin hlir an sawi a, restricted tender hmangin Consultancy Firm leh Construction Firm te an vei sung sung a, chutih laiin kan infiammi te an inhliamin mahnia inenkawl a ngai a, damdawi n atangin puk chawp leh mi tlawmngai te thawhkhawmin an intlan chhuak mek a, Sports Association-te tan lak vena tur promotional fund awm sa reng pawh hrensak an ni,” a ti a. 

Budget chungchang sawiin,“Kuthnathawktute tan budget-ah cheng nuai khat chiah sawrkar hian a dah a, hei chauh hi ni lovin, ei leh bara intodelhna tur atan cheng nuai khat chiah an dah bawk, kan budget hi a chhe hle a, budget rintlak loh leh mipuite hnen thleng phak lo budget a ni a, pass tlakah kan ngai lo,” a ti bawk.

TBC Lalvenchhunga, PAC Member chuan, “DC&MA Minister R. Lalzirliana leh Sports Minister Robert Romawia Royte te hian dan an bawhchhe ngei tih ZPM Leader Lalduhoma’n House-ah a sawi tawh a. Hmasawnna chhuanlama sumdawn nana sawrkara thuneihna hmang sual duhtu te hi insawifiah turin kan ngen tawh a, vawiin thlenga insawifiahna kan la hmuh loh avangin heng minister pahnihte hi anmahni chhia leh tha hriatna hmanga bang mai turin thurawn kan pe a ni. Danin a ban kher an phut na nih pawhin ZPM chuan hman kan la chhunzawm dawn a ni. Tin, hetianga minister pahnih te an chet theih chhan hi Chief Minister hian a pawmpui a ni tih kan pawm a, he sawrkar hi rorelna chelh chhunzawm tlakah kan ngai lo a, bang turin kan phut a ni,” a ti bawk.

Phairothanga, General Secretary kaihhruaina hnuaiah heng resolution pali (4) te hi an pass bawk a ni:-

1. Mizoram legislative assembly neih mekah dik leh huaisen taka kan leader pu Lalduhoma chetdan hi chhuanawm kan ti a, kan thlawp zel ang.

2. Pu zoramthanga kaihhruai mizoram sorkar a minister zingah  hlemhletna leh dan pawisa lova che an awm hi kan hrethiam thei lova. Dan rorelna nghak kher lova anmahni chhia leh tha hriatna hmanga inthiarfihlim nachang hre turin kan beisei a ni

3. Kan ramah hriselna leh zirna ngai pawimawh theilo khawpa mimal inhaivurna leh hleih neihna hi kan duh lova. Ram hmasawnna tur mumal sum siamna a hmang sawrkar hi bang turin kan phut a ni.

4. Kan ramah rorelna dik leh tha, mipui huapzo sawrkar din a nih theih nan kan bei zel ang.