ZALEN August 12, 2026: Lunglei High Powered Committee (HPC) Vice Chairman, Lunglei North bialtu MLA V. Malsawmtluanga chuan vawiin khan mi kut tuara thi, Mualṭhuam North tleirawl H. Lalramdinpuii, 15 chu an chenna In-ah ralin, a chhungte tuarpuina a hlan a, 'H. Lalramdinpuii Security Project' kalpui a nih tur thu a sawi.

V. Malsawmtluanga chuan H. Lalramdinpuii ralna atan pawisa fai ₹10,000/- chu a chhungte kutah a hlan a. H. Lalramdinpuii tual thihna chu pawi a ti tak zet tih sawiin, tual thattu chu a rang thei ang bera zawn chhuah a nih theih nan theih tawp a chhuah tur thu a sawi. 

Lunglei High Powered Committee (HPC) Vice Chairman hian H. Lalramdinpuii hriat reng nan leh nunau leh hmeichhiate himna atan Mualṭhuam North-ah "H. Lalramdinpuii Security" project kalpui nghal a nih tur thu a sawi a. He project kal tlang hian Mualṭhuam North hmun pawimawh hrang hrangah tuallai thlithlaina, CCTV (closed-circuit television) ṭha chi bun a nih tur thu leh hmun thim leh ralmuang lo deuh laiahte a rang thei ang berin solar light ṭha dah a nih tur thu a sawi a. Mipuite himna atan theih tawp chhuaha hma lak zel a nih tur thu leh nunaute chu hlau thlabara awm tawh lo turin a chah.