ZALEN August 7, 2026: H. Lalramdinpuii (15) d/o H.Lalawmpuia, Mualṭhuam North thihna chu Mizoram Police chuan pawi an ti a, thubuai ziah luh a nih veleh a chhui turin Lunglei Police hnuaiah Special Investigation Team (SIT) din nghal a ni.

Special Investigation Team Leader atan hian R. Lalthankima, SDPO Lunglei chu ruat a ti a, Team member atan S.I ZD Lalremruata, Lunglei PS leh ASI David Rodingpuia, Lunglei PS te ruat an ni.

S.I.T hi Mualthuam North-ah inkhuar nghalin ngun tak leh uluk takin hnuchhui hna an thawk nghal a. Tun dinhmunah rinhlelh thua man an la awm rih lova, theihtawpin he tualthahnaa pawikhawihtu hi man chhuah tumin beih mek a ni.

Hemi chungchangah hian thu belhchian dawl lo thehdarh lo tur leh Police hnuchhuina tikhaihlak zawnga khawsa lo hram turin mipuite an ngen a, pawikhawihtu man chhuahna kawngah theihtawpa Police te thawhpui turin mipuite an sawm a ni.

H. Lalramdinpuii (15) d/o H.Lalawmpuia, Mualṭhuam North chu Ni 3.8.2026 (Thawhtan) zan dar 08:30 PM vel khan an in aṭanga a chhuak chin hriat lohvin a bo a. Khawtlangin ngawrh taka an zawn hnuin ni 5.8.2026 zing dar 10:20 AM vel khan Govt Middle School, Mualṭhuam North compound-ah thia hmuh a ni.

Hemi chungchangah hian Lunglei Police Station C/No. 84/26 Dt. 05.08.2026 U/S 103(1)/140(1) BNS ziah luh a ni. He thil thleng hian Police beng a thlen veleh rang takin SDPO leh a team te bakah Forensic lam te a hmunah kal nghalin Inquest leh a hmuna tih tur tulte tih nghal a ni a, a tuk ni 6.8.2026 ah ruang hi Civil Hospital, Lunglei ah PME neih a ni.