Aizawl June 2, 2024 : Hrangturzo bialtu MLA leh Adviser to CM ni bawk Lalmuanpuia Punte chuan nimin khan a bial chhunga khaw 3 Biate, East Lungdar leh North Vanlaiphai damdawi ina hman tur X-ray khawl thar a pe.

Khawl thar hlanna inkhawm, Adviser to CM office a neihah thu sawiin Lalmuanpuia Punte chuan, "Zirna leh hriselna lam hi ka ngai pawimawh a. Eng ber nge kan tangkaipui ang tih ngaihtuahin tun tumah hian khaw 3 a hman tur X-ray khawl hi kan lei ta a ni," a ti. X-ray khawl thar chu 300 MA a ni tih sawiin khawl pakhat leina leh bunna senso atan hian nuai 6 vel a ngai dawn niin a sawi a. Tun tuma khawl an leina chu MLA fund hlui, la hman loha awm atangin a ni tih a sawi bawk.