ZALEN May 16, 2026: Mizoram Universal Health Care Scheme 2.0 atana inziah luh hun tawp ni thleng khan chungkaw 46,228 inziaklut an awm a, Ziahluh chin MUHCS hmang thei hi mi 2,19,353 an ni.

2025-2026 chhunga MUHCS 1.0 kalpuiah khan kum tluan inziak lut hi chhungkaw 20,213 an ni a, nikum nena khaikhinin kumina inziak lut hi 26,015 in an tam zawk a ni.

Hriat theih chinah MUHCS hi mi nuai 12 velin an hmang thei dawn nia ngaih a ni a, Offline-a inziak lut leh Pensioner inziak lut zat hi la hriat theih loh ni mah se, chhut danin Online-a inziak lut 2,19,353 te, AB PM-JAY atanga MUHCS zawm mi 5,99,433 te, sawrkar hnathawkte leh offline leh pensioner te nen mi nuai 12 velin MUHCS hi an hmang dawn niin ngaih a ni.

MUHCS 1.0 ah kha damlo inenkawl senso bill pek theih loh a awm lo a, bill an pe tha a ngaih a ni a, MUHCS zawmtu mimal enkawl damdawiin te pawhin an thatpui niin hriat a ni.

MUHCS 2.0 kalpui mekah bill vbc 15.69 pek chhuah a ni tawh a, hetihlai hian Technical thil avangin PM-JAY zawmtu bill erawh pek rih lo a awm a, Health Department chuan heng bill te hi pek vat a nih theih nan theih tawp an chhuah tih a sawiin, sum pekchhuah kawngah harsatna an nei lo, technical thilah erawh harsatna a awm leh thin, an ti.