ZALEN August 23, 2026: Mizoram sawrkar chuan Mizoram Universal Healthcare Scheme (MUHCS) 2.0 a hman tan hnuah damdawi ina damlo enkawlna senso atan Rs Vbc. 74.60 a pe chhuak tawh.

MUHCS 2.0 hi April 1, 2026 atangin hman tan a ni a, he scheme thar hian chhungkaw tin inenkawlna atan kum khatah Rs. Nuai 5 thleng a huam a, damlo inenkawlna senso phurrit chhawk zangkhaina tura duan a ni.

ZALEN thudawn danin MUHCS 2.0 hman tan atanga August 19, 2026 thleng khan damlo (beneficiary) 25,156-te inenkawlna Rs. Vbc. 74.60 Mizoram sawrkarin a seng tawh a ni.

MUHCS 2.0 hnuaiah chungkaw 49,927 inziak lut an awm a, MUHCS 1.0 hnuaiah inziak lut chhungkaw 20,198 an lo awm tawh a. MUHCS 2.0 hnuaiah hian sawrkar hnathawk mi 35,325 inziak lut awmin pensioner 11,928 an awm a, AM-PMJAY (Golden Card) 2,22,943 hmang an awm bawk a. MUHCS 2.0 hi mi nuai 12 velin an hmang thei dawn nia ngaih a ni

MUHCS thawktute chuan MUHCS 1.0 ai chuan 2.0 zawmtu an pung tih an sawi a, general category-ah phei chuan a let aia tamin an pung niin an sawi.

Kum kalta khan 20,198-in an zawm laiin kuminah chuan 49,927-in a zawm thu an sawi a. Sawrkar hnathawk leh pensioner-te chu che reng a nih avangin figure dik tak hriat theih a nih loh thu leh AB-PMJAY chu a hranpa a inziah luh ngai lo a nih avangin a danglam lo niin an sawi.

Tar lan tawh angin Mizoram chhunga mi mal leh kohhran enkawl damdawi in 19 bakah Mizoram pawnah private/trust/mission hospital 52-ten MUHCS an zawm tawh.