ZALEN, December 24, 2025: Mizoram chhunga private damdawi in 15 leh day care centre pathumin Mizoram Universal Health Care Scheme (MUHCS) zawm tawhin heng hmun 18 bakah state pawna damdawi in 26-ah damlo a thlawna inenkawl theih a ni tawh a. MUHCS hman theihna hi damdawi in 41 leh day care centre pathum, a vaiin 44 a awm tawh.

Mizoram State Health Care Society thawktute hnen atanga ZALEN thudawn danin Mizoram chhunga MUHCS zawm tawh damdawi inte hi Aizawla damdawi in pasarih - JC Eye Hospital; Nazareth Hospital, Chaltlang; Nazareth Hospital, Ramhlun North; Redeem Hospital, College veng; Synod Hospital, Durtlang; BN Hospital & Research Centre, Kulikawn leh Eye Care Hospital, Dawrpui te an ni.

Aizawl khawpui pawna zawm/ hman theihna damdawi inte chu Champhaiah DM Hospital leh MED-AIM Hospital; Lawngtlaiah Christian Hospital leh Lairam Christian Medical Centre; Lungleiah Christian Hospital, Serkawn, Faith Hospital leh John Williams; Siaha-ah Maraland Gospel Centenary Hospital te an ni.

MUHCS zawmtu day care centre-te chu Kidney 360 Superspeciality Clinic & Dialysis Centre, Bazar Bungkawn; Rapha Day Care Centre, Zarkawt leh Vohbik Day Care, Salem veng te an ni.

Hei bakah hian Mizoram pawna damdawi in 26-ah MUHCS hi hman theih a ni bawk.

(Thudawnna dik loh palh avangin chhuak hmasa lamah khan MUHCS hman theihna damdawi in tar lan sual palh a ni a, ZALEN-in thupha a chawi e).