ZALEN November 3, 2025 : ZPM party chhung inkhawm vawiina neih a thu sawitu Health Minister Lalrinpuii chuan ram tana thil tha ni a kan hriatah chuan huaisen takin an kal zel dawn a ti a, ruihhlo ngaite tan nuai 113 an seng tawh a ti a, ruang phurh nan nuai 150.57 an hman tawh thu leh MUHCS bill cheng nuai 6604 pek a nih tawh thu a sawi bawk.

Health Minister chuan, “Ruihhlo ngaite enkawlna atan leh buaipui nan Mizoram Synod lamin phal takin Synod Revival Camping Centre min hmantir a, ni 20 chhung camping neih thin a ni. After Care Follow up ti turin Volunteer Psychologist leh Social Worker mi 100 rual velin an umzui nghal a. Kar tin an inah tlawhin thla 3 chhung an vil zui thin. Hulhliap Short Stay Programe-ah hian mi 817 vel enkawl an ni tawh a, tunah hian batch 5-na kalpui mekin November 17 ah batch 6-na kalpui leh tum a ni. Tun thleng hian ruihhlo veite enkawl nan sawrkar in cheng nuai 113 a seng tawh a ni," a ti. 

Social Welfare Minister ni bawk Lalrinpuii chuan sawrkarin ruang phurhna atan cheng nuai 150.57 a seng tawh a, mi 1445 te ruang chu an inlumah thlensak an ni tawh a ti.  

Damdawi in hrang hranga damlo mi 44,546 -te inenkawlna bill peksak an ni tawh a ti a, sawrkar sum sen zat chu cheng nuai 6604 a tling a, phaiah mi 2637 refer an ni tawh tih sawiin Lalrinpuii chuan, "Harsatna awm lovin damdawi in te hnenah kar tin bill kan la pe chhuak thei a, thawktute chungah lawmthu ka sawi a ni. Nakum atangin Mizoramah Kal thlak (Kidney transplant) theih turin kan inbuatsaih mek a, MUHCS zawmtute tan tunah hian Lung pawp pawh a thlawn vekin ZMC-ah zai a ni tawh a ni," a ti.