ZALEN July 02, 2026 : Mizoram sorkarin Mizoram Universal Healthcare Scheme (MUHCS) a kalpui mek zawmtu damdawi in zinga mi, Nazareth Hospital chuan lut tharte tan cashless an kalpui thei rih lo tih an sawi a, sorkar nen erawh inbiakna kalpui mek a ni. Heih lai hian MSHCS lam chuan damdawi in empanelled zingah bill dik lo thehlut thin an awm thu an sawi ve thung.

Ningani khan social media-ah Nazareth Hospital, Chaltlang, Aizawl thuchhuah nia ngaih darh pakhatah Mizoram State Healthcare Society (MSHCS)-in pawisa vaibelchhe tel an bat avangin harsatna an tawk nia tar lan a ni a. Hemi chungchanga ZALEN-in a biaknaah erawh thuchhuah an siam lo tih an sawi.

Hetih lai rual hian an damdawi ina lut thar turte chu cashless a theih rih loh thu an hrilh tih an sawi a, Health Care lamin sum an bat sak leh staff-te pawn hlawh an lak theih loh thu an sawi bawk a, an hotute leh minister-te an inbiak mek thu an sawi.

MSHCS atanga ZALEN thudawnna chuan MUHCS zawmtu damdawi in zingah an hnena bill thehluhah felhlel a awm thin avangin pawisa pek loh (payment tihsak loh) an nei ngei tih an sawi a, damdawi in mal hming erawh an sawi lo.

“A then chuan damlo awm rei zawng an lo ziak danglam a, rei tak tak awm anga lo ziakte an awm a. Package rate-ah chaw a tel laiin a hrana damlo hnenah chaw man lo bill te an awm a. Hetiang vang hian payment tihsak loh kan nei,” an ti.