ZALEN September 7, 2025: April, 2025 atanga hman tan, Mizoram Universal Health Care Scheme (MUHCS)-ah Mizorama mi mal damdawi tam zawkte tun thlengin an la tel lo a, Non-Government Hospital Association, Mizoram (NGHAM) hruaituten mipui an khawngaihthlak niin ZALEN an hrilh.

NGHAM hruaitute hnen atanga ZALEN thudawn danin MUHCS zawm leh zawm loh chungchangah Mizorama mi mal damdawi in tam zawkte chu an dinna ngaiah an la ding a, tun dinhmunah chuan zawm leh zawm loh chungchangah thu thar an nei lo a, tun hnaia sawrkara lehkha an thehluh an nghak mek bawk.

NGHAM hruaitute chuan MUHCS chungchangah Mizoram sawrkar leh private hospital tam zawkte an la inthlunzawm loh avangin mipui an khawngaihthlak niin an sawi a, sawrkar damdawi in chang lo, sum nei bawk si lo mi tam takte chu an awm man leh an enkawlna man chawi mang loa an admit mek thu an sawi.

Hetihlai hian Mizoram Legislative Assembly Session neih zawh takah Health Minister Lalrinpuii chuan mi mal damdawi inten MUHCS an la zawm loh chhan ber chu cashless an duh loh vang nia a lan thu a sawi a. An la inbiak reng thu leh cashless an la pawm ngei an beisei thu a sawi bawk.

MUHCS hnuaiah hian AB PM-JAY, Mizoram State Health Care Scheme leh sawrkar MR-te chu chhun fin an ni a, kalphung khat hnuaia kalpui a ni a. Hemi hnuaia hamthatna dawn theih dan erawh siam danglam a ni thung a. Civil pensioner leh provisional employee-te pawh pawh he sheme hnuaiah hian hamthatna siamsak an ni.

MUHCS-te hi sawrkar damdawi inte leh empanelled hospital-te-ah hman theih a ni a, sawrkara inziak lut lo damdawi inah erawh hman theih a ni lo.

Tun dinhmunah MUHCS hnuaia Mizoram sawrkarin damdawi ina thawhpui (empanelled hospital) Mizoramah 11 leh day care pathum, state pawnah 25 leh deemed empanelled hospital 13 a awm.