ZALEN November 19, 2025: Hyderabad-a inkulh Yashoda Hospital leh an hnuai hospital pali te chuan vawiin khan Aizawl Press club-ah press conference an ko a, Mizoram Universal Healthcare Scheme (MUHCS) an zawm thu leh robot hmanga mi zai thin an nih thu an sawi a, Mizo mipuite tan theihtawp chhuah an intuam tih an sawi.

Yashoda Hospital thawktute chuan inzai lam chu an inchhuanna a ni tih sawiin Laparoscopic hmangin natna te an en thin bakah robot hmanga zai an kalpui thin an ti a, hei hian mihring-ah hliam a siam tlem bik a, inzaina hnuhma pawh a dam hma bik an ti, tun hmaa cm 22-a zaua zai ngai te kha tunah chuan cm 5 bak ngai lovin an zai thei tawh a, hei hian hliam a ti dam hma bik a ni, an ti.

Cardiology, Incology, Neurology, Nephrology, Pulmonology, Gastro Surgery, Orthopaedic bakah Mipa ten mipatna lama harsatna an tawh thin pawh an enkawl thei tih Yashoda Hospital te chuan an sawi a, kawng hrang hrangin, an harsatna tawh dan a zirin an pui thei an ti.

Mizoram khua leh tui sawrkar hnathawk tan kum khatah a thlawnin sum bithliah awm lovin an enkawl thei a, Pensioner tan cheng nuai 12 thleng an enkawl theih thu leh mi nawlpui tan cheng nuai 5 thleng a thlawnin an enkawl theih thu Yashoda Hospital hotute chuan an sawi bawk.