ZALEN Jan 29, 2026: Mizoram Universal Health Care Scheme chuan zawmtu neih belh zelin, Mizoram sawrkar leh Medanta Hospital chuan inremna thuthlung an ziak.

Hmarchhak biala hriselna dinhmun tih hmasawn zel nan Medanta Hosptail chuan tun hnai khan Mizoram sawrkar nen Mizoram Universal Health Care Scheme (MUHCS) ah thawhdunna tur thuthlung an ziak a, hei hian damlote chu pawisa chawi ngailova an damdawiin kaltlanga an in enkawl theihna tur a chhawpchhuah sak a, Medanta Hospital hi ramchhung hmun hrang hrang Gurugram, Noida, Lucknow, Patna, Indore, leh Ranchi ah te a awm a ni.

Medanta damdawiina Chairman leh Managing Director Dr. Naresh Trehan chuan hmarchhak biala hma thar an lak na chu lawmawm a tih thu sawiin hei hian mipuite tan thil tha zawk a thlen ngei a beisei a ti a, Medanta ah chuan damlote uluk taka enkawl annih thin bakah an hamthatna tur hrang hrang ngaihtuah sak thin a ni a ti a, Mizoram sawrkar nena an thawhdunna chuan rah tha a chhuah ngei a beisei tih sawiin, Mizo damlo an damdawiina enkawl tur an awm chuan theihtawp an chhuah dawn tih sawiin mitin ban phak nih an tum thu a sawi.

Mizoram hian hriselna kawngah harsatna tam tak a tawk thin a, ramchhunga Cancer tamna ber niin ramchhunga state hrang hrang zingah hriselna kawnga pachhe tak an ni a, a ramchhung awmdan te leh hmun kilkhawr zawk damdawiin awm mumal lohna thin chu tih hmasawn kawngah theihtawpin sawrkarin hna a thawk mek a, mi tin te mahni dinhmun hriatchian kawngah inhrilhhriat thar anih theih nan hma lak mek a ni bawk.

Mizoram State Health Care Society CEO Dr. Lalhriatzuali Ralte chuan Medanta nena an thawkdun tur chu Mizote tan chanchin lawmawm tak a ni a ti a, hemi hmang hian Mizoram atanga damlo phai lam kal duh tan harsatna tam tak a chhawk zangkhai ngei a beisei tih sawiin, in enkawl kawngah pawh damlote tan kawng awlsam zawk a siam sak ngei a beisei tih a sawi.

Hmarchhak biala hriselna dinhmun tih hmasawn kawngah Medanta hian nasa taka hma la in Guawahati, Assam-a an damdawiin chu khum 400 chuang awm theihna super speciality hospital ni turin an chei thar mek a, heng bakah hian Medanta chuan hmarchhak bial tan bik ṭanpuina koh theihna tur number : 8904395588 a chhawpchhuak bawk a ni.

-- Inremna thuthlungah hian mipui zawng zawng huap tura duan a ni

-- Inremna ah hian ramchhunga Medanta hospitals paruk te chu MUHCS nen thlunzawm vek tur a ni