Aizawl : “Aizawl Municipal Corporation kalphungah hian tun hnaiah sawi dan hrang hrang a awm thin a. Mipuiten thudik tak leh a nihna kan hriat a pawi-mawh hle a ni,” tiin MNF Sr. Vice President Tawnluia chuan nimin khan thuthar thehdartute hmaah a sawi.

Tawnluia chuan, “Urban Local Bodies (ULB) emaw, Municipality-te emaw hi chi hrang hrang a awm thei a, Municipal Corporation phei chu a dinhmun a sang ber a, Mizoram sawrkar (UD&PA Department) chuan AMC kutah Constitution-in Provision a pek ang takin subject pathum - Roads & Bridges, Water Supply for domestic, industrial & commercial purposes leh Fire Services tih loh hi chu AMC kutah a hlan fel vek tawh a. Amaherawhchu, AMC lam hian an capacity mil zelin subject an lak chhoh zel tur a nih avangin a tahtawlin a la chho zel tur a ni ang,” a ti.

UD&PA changtu minister chuan, “AMC/ ULB function danah hian mahnia inrelbawl leh thuneihna kengkawh an nih lai reng hian India ram federal structure-ah hian inkhai-diat mumal tak a awm a. Central sawrkar kutah eng emaw chen state-te kan awm ang hian, ULB/Municipality-te enkawlna hi state sawrkar kutah a awm a ni,” a ti.

Municipality-te hi an thu thua kal tur ni lovin, state nena inlungrual taka thawkho tura duan, niin a sawi a, fund kaldan chungchangah te leh policy duan thu-ah te state sawrkar pawmpui leh state sawrkar ruahmanna lo chuan a kal mai mai theih loh, a ti. Regulation siam leh sum hmanna tur action plan-te pawh state sawrkar pawmpui phawt loh chuan sum ruahman theih a ni lo. Hetianga state sawrkar nena lungrual taka an kal theihna tur hian federal structure mumal tak kalphung a awmsa vek a ni, tiin a sawi.

Kumin inthlan tur chu bawlhhlawh sawngbawl dan leh paih dan kan sawi nasa khawp mai a, hmasawnna lawmawm tak a ni. Mi thenkhatin bawlhhlawh paih dan awlsam kan ngaihtuah ang an ti a, mipuiah thu dik lo kan inhrilh palh ang tih a hlauhawm em avangin han sawi lan hram a tha a, dan zawm lo chu National Green Tribunal ten na taka hremna an pek theih a ni a, zawm a nih loh chuan a vuak let chu na tak a nih tur thu a sawi lang tel bawk.