Aizawl: Mizoram Underground Returnees Association (MURA) chuan rorellai Mizoram Pradesh Congress Committee (MPCC) nena inremna tih hlawhtlin phutin an office ah chaw an la nghei chhunzawm zel. MURA hian an thilphut tih hlawhtlinnan hian June ni 6,2018 atang khan an office, Tuikual ah chawngheia nawrh hi an tan a, MPCC chuan palai tirin an chawnghei hi June ni 15,2018 khan an titawp lailawk a, mahse an beisei ang hlawhtlinna an hmuhloh avangin June ni 19,2018 atang khan an chhunzawm leh a ni. MURA te hian kum 1998 leh kum 2013 Assembly inthlan dawnah Congress party-te nen inremna an siamah MPCC & MURA agreement angin, MURA member in hmun neite in sak tanpuina nuai 20 theuh sawrkarin pe turte, sawrkar hna 4th. grade atanga LDC thleng (MRHG telin) ram puma MURA member tu leh fate tan post 200 sawrkarin pe turte, Contract/ immediate relief MURA-te intuam hlawm nan sawrkarin pe tur leh NLUP a rang lama ram puma MURA-te pe turin an phut a ni. MURA President PC Lalthuama chuan an thilphut a hlawhtlin hma chu chawnghei chawlhsan an tumlo tih a sawi. Hetih lai hian chawngheia nuar mek MURA member te hi kum upa lam an nih tawh avangin an chauh tawh niin an sawi a. Aizawl DC chuan chawnghei te dinhmun thlithlai tur hian tunhnai khan Doctor a tir nia thudawn a ni.&&&&