MURA in minister RK-a dawt a puh chungchangah FIR an thehlut

Aizawl; Mizoram Underground Returnees Association (MURA) hruaitute'n Reveneu Minister Lalruatkima chu dawt a puh hmingchhiat a ni tih sawiin, thudik lo vawrh darh tute man chhuak turin Aizawl PS ah FIR an thehlut.

Nimin khan Aizawl Press Club ah thuthar thehdarhtute kawmin, MURA Gen. Hqrs. president PC Lalthuama chuan, hming pawh ziak ngam lo, tute nge an nih pawh hriat loh 'Ram neitu' intiten 'Chem lova lu latu Revenue Minister Lalruatkima' tia thuchhuah an siam ve ngawt chu a taka ram neitu, MURA Gen. Hqrs. member te'n thinrim thlak an tih thu a sawi.

MURA president sawi danin, MURA te chuan kum 10 (MLA term hnih) chhung Congress Party an thawhpui a. An thawhho chhungin Tuivamita P&E Dept ram mawngah ram ruak engemaw zat an hmu chhuak a, chu chu Congress Sorkarah khan an thlen ta a. He lai ram ruakah Sorkar chuan House Site Plan a siam ta a. He House Site Plan-ah hian Congress Sorkar chuan MURA Member-te tan in hmun/plot engemaw zat chu Direct LSC siamsak turin hma a la nghal a, LSC siamna tur fee pawh an pe lawk vek bawk.

Kum 2018 MLA inthlan dawn ah MNF an thawhpui leh tak avangin Congress Sorkar khan LSC siam tura hma a lak mek chu a cancel sak leh ta vek a. In hmun nei tura an lo inngaih tawh laia kan chan ta vek mai leh, LSC siamna fee tur kan pawisa pek lawk thlenga an chan ta chu ngai thiam lovin Finance Department-ah kan dil let leh nghe nghe a ni.

MNF Sorkar a lo pian khan MURA Member thenkhatin MURA chhuahsanin, Congress Sorkarin MURA tana Direct LSC tura hmalakna a cancel tawh chu tlawhchhanin Revenue Department chu Court-ah an khing ta a ni.

MNF Sorkar thar in Congress-in MURA hnena ram pek a lo tum tawh chu ngai pawimawhin Plot thar siama tinung turin hma a la ve ta a. Hei hi Court-a kalte chuan an pawm thei lova Congress Sorkarin a lo cancel tawh zawk chu tihnun leh talh tumin Department an khing zui ta zel a ni.

MURA zidingte chuan Court kal ve lovin sorkar thu kan nghak ta a. Dawhthei taka nghaktu MURA Member-te chuan Tuivamit rama in hmun re-Plot chu engemaw zatin an chang ta a ni.

Hemi chungchangah hian Ram neitu intiten ram 25% laa Revenue Minister Lalruatkima an puhna chu dawt chiang tak a ni a. Thudik lo vawrhdarhtu hi man chhuak a, an phu tawk hremna an tawrh ngei theih nan November 3, 2023 khan Aizawl Police Station-ah FIR an thehlut nghal bawk a ni.

Ram neitu intite hian Tuivmit-ah ram an nei lo va, sorkar ramah pass pawh nei lovin in an lo sa ve ngawt zawk a ni. An in sak hi chawlhsan turin Revenue Department chuan lehkha a pe thin a, sorkar ramah dan lovin kut an thlak lui zel zawk a ni.