‘Murvate thlawk in leng la, Romei zing riai karah; Chhailai Di lenna run saw va bel ta la, Han hlan ang che ka hmangaihna.’ He hla lar tak thin phuahtu Lalthangliana Hnamte hi Thingsai khuaah 12,Oct 1948 khan a lo piang a. An unau hi pakua lai niin farnu 2 an nei a, an pa rual hle,a ni hi a upa lam a 3-na a ni.Amah bakah  hlaphuah leh zai lamah a u Lalremsanga(L) leh a nau Zira Hnamte te pawh mi hriat hlawh pawl tak an ni ve awm e. Lalthangliana Hnamte hi thiamna lamah BSc,BEd, BD niin Thingsai High School ah Science zirtirtu niin 1973-1985 May thla thleng a thawk a, zirtirtu atanga a ban veleh hian Rinna Kohhran  General Secretary hna chelh nghalin Lunglei ah an pem thla ta a ni. 1990 September ah Baptist Kohhranah lutin Serampore-ah BD a zir a, 1994-ah a zo va, hemi kum vek hian Lawngtlai North Bialtu Pastor hna a chelh a, chuta tangin Executive Secretary-ah rei tak thawk lehin chumi hnuah  BCM Headquarters Serkawn-ah Christian Education Director hna a chelh a, chumi hnuah  Coordinator, Pastoral hna a chelh leh a ni. Tunah hian a hna atanga chawl ve tawhin Lunglei Zotlangah  a nupui fanaute nen an khawsa mek a ni. Kohhranah Pastor hna zahawm tak lo thawk tawh mah se he thu hi ka han phawrh thar leh a. 1997 khan amah ngei hi ka lo interview tawh a, chu ka interview na atang chuan Lunglei chanchinbu (magazine) Mizo Hnam Ro-ah July 1997 issue ah khan article ka lo ti chhuak tawh a ni. Hetia a hlaphuah leh ama chungchang ziak hi hmanni lawk khan ka dil leh a, a phalna a ziak ka ni tih ka han sawi hmasa a ni. Lalthangliana Hnamte hi hlaphuah thiam tak a nih bakah AIR Shillong-a Mizo Radio Artiste hmasa pawl a ni a, ‘Johny Lalthangliana Hnamte leh a Pawlte’ ti in hla engemaw zat an lo record tawh a ni. Min hrilh danin lengzem leh hla lenglawng hi 32 vel a phuah a, chung zing a lar zual em em chu 1968-a a phuah, ‘Chhailai Di Lenna,’ mi tam zawkin ‘Murvate’ ti a an hriat hi a ni awm e. He hla hi Lalsangzuali Sailo khan a lar vanglai takin fuh lutuk leh lung tileng em emin he hla phuah kum vek hian AIR Shillong-ah a record a. A hnu 1970-ah HMV Records ah khan a thun leh bawk a ni. He hla ‘Murvate’ lar vanglai tak tak chuan Mizoram dung leh vang mai bakah Burma, Arakan, East Pakistan (tunah Bangla Desh) leh C/O 99 APO tih velah a larin an thlang nasa thei hle thin. TNT Camp a Pangpar Huan a mi pakhat phei chuan he hla hi a atchilh nasa hle thin tih TNT enkawltupa ber Pu Sangthankima’n min hrilh nghe nghe a ni. Chuti vel chu a ni. ‘Chhailai Di Lenna’ tih hla hi Lalthangliana Hnamte hian February 1968-a Shillong-a St.Anthony’s High School a Class X a zir laia a phuah a ni a, Auxilium Convent bul a Khasi in pakhat ‘Lone Pine Cottage’ an luah lai a ni. Lalthangliana lunglen hun lai hi thal lai, February,March lai hun hi a ni ve tlat thin a. An inluah chhak lawkah hian Daikal in a awm a,tuk khat chu inthiar tur a a kal laiin Vamur hi hnai te te-ah an rawn thlawk nak nak mai a. Khaw dang lang thei lek lovin hmar lam chu romei zam in a bawh chuk mai bawk si a. Chutah a thinlungah chuan thawnthua Tualvungi ko tura Vahui an tirh thu kha a rawn lang ta uar uar mai a nih kha. A lunglen thu thlen turin a ni chuan Vahui ai chuan Vamur thlawk chak zawk tak mai chu tha zawkin a hre ve ta tlat mai. Vahui ai chuan Vamur chuan tawngkam pawh a thiamlo zawk mai thei, mahse a lunglen thu hi a ‘Emergency’ em avangin a tawngkam thiam zawk lam aiin a thlawk chak zawk Vamur nge nge chuan thu a thlen rang thei zawk a ring in Vamur tirh zai chu a rel ta a ni. Tichuan Shillong Auxilium Convent bul a Lone Pine Cottage neitute Daikal in, pucca building pawh ni lo, bulah chuan minute tlemte chhungin Mizo lengzem hla zing a mawi leh lar,mi duh hlawh pawl tak ni tur ‘Murvate’ ti a hriat lar zawk, ‘Chhailai Di Lenna’ hla chu chumi tuk chuan a lo piang ta a ni.Amah a phuahtu chuan khaw hla tak a ngaihzawng neih avanga phuah ta ni pawh in a in sawi lem lo. Murvate atang hian han peng thui hlek ila. Lalthangliana hian a hla phuah tam tak zing a duh ber (Pathian hla ni loah chuan) chu ‘Lenrual Hlui’ hi a ni. Tunah he hla hi Class VIII zirlai ah tel in ka hria a,a la tel zel turah ka ngai ngawt a.He hla hi a thian hluite, ‘Johny Lalthangliana Hnamte leh a Pawlte’ ti a radio-a a lo zaipui thinte Zosangliana Murray (Chanmari, Lunglei), Lalsangliana Saza (January 2014-a boral ta, Rahsiveng, Lunglei), Lalchhawnsanga (Ramhlun Veng, Aizawl) leh fam tawh Davy Sanglura-Kawtea (Lunglei Zohnuai), Dotawna (Director Rtd, Fishery Dept.) leh boral tawh Joseph Zoramthanga (Art & Culture Dept.) te a ngaihzia a phuahna a ni. Heng a thian hluite ho nen hian Shillong tlai ni tla tur hnuaiah,far thing hnuaiah ngei khan,far hnah ro tla te chu hal a, ai pah in duh thu te sam ho in an zai ho thin kha a ni a.An duhthusam zing a lar deuh chu Sorkar hnathawh hun a Record Player lei kha a ni ber mai.Khang lai hun kha chuan mi nazawngin Deck chu sawi loh Record Player pawh kha neih ve ngawt theih pawh a ni lo,pawisa a la vang lutuk.Heng an duhthusam ai a tha tak tak,music system tha zet zet chu an nei ve far tawh hlawm a nih hi,an duhthusam a thleng dik zet e. ‘Lenrual Hlui’ hla hi 1973 ah Shillong ah chang khat leh chang hnih na a phuah a,hemi kum vek hian Thingsai ah zirtirtu a nih laiin class room chhungah a phuah zo a ni!Lalsangzuali Sailo,Linda Zopuii Sailo(AIR Shillong-Gauhati artiste), Vanlalhmangaihi leh zaithiam dangten radio-ah an sa hlawm a, thlan a hlawh hle thin. A phuahtupa rilru khawih ber chu a chang 2-na ‘Min hnemtu awm hian ka ring si lo, khuarei hian min la hnem ve mahna,’ tih lai tak mai hi a ni. Khuareiah hian lunglen hi lo reh ta tak tak dawn se, lunglen han reh mai tur chu a ui bawk si, chumi lunglen reh hun ngei mai chu a la lunglen thlak deuh deuh zawk dawn niin a suangtuahna khawvelah chuan a ngaihtuah a, a huphurh a, a ui lawk a ni ber e. Tun Mizo Idol(2014) Hranghlui zanah khan Murvate tih hla hi Lancy Remlalhruaii’n thiam taka sain Lenrual Hlui tih hi Mizo Idol Runner-up Lalhlumawii’n a sa thung a, an thiam ve ve hle a nih kha. Lengzem hla a phuahte zingah –Hmangaihna, Nunhlui, Puan Ang An Chul Zo Ta, Zozam leh A Leng Mang E tihte pawh a lar hlawm hle thin. Lalthangliana hi 1975, Good Friday chawhnu dar 1-ah Shillong Umpling Mizo Biak Inah Evangelist Thangkima (L) rawngbawlnaah a piangthar a, heta tang hi chuan Lal Isua tan a inpe pum puhlum tain Lal Isua chawimawina leh fakna hla a lo phuah ta thung a ni. A pianthar hnua a hla phuah hmasak ber chu ‘Lalpa’n Thu A Sawi E Lo Ngai Teh U’ tih a ni. He hla hi Rinna Kohhran Hlabu ah a awm. Pathian Hla a phuah lar deuhte chu – ‘Kanan Ram Mawi Leh Duhawm Chu,’ ‘Thil Hluite Chu,’ ‘Isua Tawngtaina,’ leh ‘Kristan A Hmang Duhlo Che,’ tih te hi a ni awm e. Rinna Kohhran Hlabu ah hian a hla phuah 52 vel seng luh a ni a,a hlaphuah pakhat ‘Thil Hluite Chu’ tih hi 1977 kumhlui thlah zana Thingsaia a phuah a ni a, hemi zan hian he hla hi an sa tlaivar zak a ni. Tunah chuan hlaphuah lam chu a chawl ta rih a,hla ni lo in thu lamah kal in Lal Isua rawngbawl turin a hun zawng zawng a hlan ta a ni. ‘Hun kal ta zawng zawng ka han thlir a, Aw Lawmna leh malsawmna ni te An liam ta a hun thar chuan min hruai zel a. Thil hluite chu Lalpa ah chuan Tih ral in an lo awm ta a; `    Aw ngaiteh u Lalpa ah chuan Siam thar a lo ni leh zo ta.’ Lalthangliana Hnamte (circa 1977).