Music Travel Love chuan Zirtawpni zan khan LPS Arena, Folkland-ah concert an nei a, chhimtu pawh an thahnem hle.

Mipui nghahhlelh he concert-ah hian mi sang chuang an pung khawm a, an kal khawm chhan Music Travel Love te zai lungkuai leh nuam titakin an ngaithla a ni - LPS Arena-ah mipui an khah avangin a hlawhtling ti ila kan sawi sual awm lo e.

Music Travel Love (The Moffatts) te hi Alpha Omega te chah chhuah an ni a, Aizawl-ah ngei an rawn zai thei hi an mahni ngaisangtute tan chuan a hlu hle. Concert an neih hma hian Reiek tlangah an lawn a, music video an shoot a ni.

An music video thar tur hi 'Love will keep us alive' tih a ni a, khawvel hmun hrang hranga music video nalh tak tak siam thinte khan Mizoramah ngei music video an rawn shoot ve hi a lawmawm tak zet a ni.

Hei bakah hian chanchin lawmawm hriat tur dang a awm bawk a, Mizoram Youth Commission buatsaih 'Perhkhuang' atanga mipuiin kan hriat chhoh Daniel Lalawmpuia thawhpui an duh thu an sawi. Daniel-a hi a aw mawi an tih thu an sawi bakah, "Hmalam hunah thawhpui ngei kan la duh," tiin an sawi - a tak ram thleng tak maw?

The Moffatts - Bob Moffatt leh Clint Moffatt te hian July 17 khan Aizawl an lo thleng a, Zirtawpni zan khan an concert a ni. Concert-ah hian Mizo artist tha tak takte bakah, band lar - Lilac & Jacks, Shai Hills leh Evenflow te pawh an perform a ni.