April 22, 2023; Khawvel ram danga Muslim-te rualin Mizorama Muslim-ten tukin khan an hun pawimawh, Id-ul Fitr an hmang a, Aizawlah chuan Chaltlang field-ah tukin dar 9 khan a huhovin mi 3,500 vel an tawngtai rual a ni.

Aizawla tawngtai rualna hi Aizawl Mosque-a Imam, Maulana Bilal Ahmed-a’n a hova, Koran atanga chang thenkhat a chhiar hnuah fuihna thu a sawi a, hemi hnu hian Muslim kal khawmte chu a huhovin an tawngtai a ni. 

He hun a thuchah sawitu, Aizawl Mosque Secretary, Mohammed Mamon Majundar chuan Mizoram mipui zawng zawng, ram leh khawvel pum tan an tawngtai tih a sawi a. Chaltlang Sporting Club leh Chaltlang mipuite chungah tawngtaina atan field an hmantir avangin lawmthu a sawi.

Kalkhawmte chu Mizorama an awm chhungin ILP dik tak a nei turin a chah a, mahni hna chauh thawk tur a chah bawkin, Mizoram mipuite chungah an mite kawng hrang hrangah hna an pek avanga lawmthu sawiin, Mizoram police-te'n venhimna an pek avangin lawmthu a sawi bawk.