Mizorama volleyball league sang ber, Pro Volleyball League (PVL)-a inlan phakten an inchuh, Mizoram Volleyball Association (MVA) Cup 2023 chu a hmawrbawk dawn a ni ta a. Zirtawpni hian final khelh a ni dawn.

Luangmual vs Diakkawn

Aizawl West Joint YMA Hall-ah tlai dar 5:00-ah hmeichhe final-ah PVL champion lai, Luangmual Volleyball Club leh Diakkawn Volleyball Club, Kolasib an inkhel dawn.

Team panga inlan zingah Pool A atangin Luangmual hi sang berin Ningani khan semifinal-ah Serkawn Volleyball Club, Lunglei chu 3-1 (25-23, 24-26, 25-17, 25-23)-a hnehin final an lut.

Diakkawn hi Pool B atanga tlang ve thungin semifinal-ah Bungkawn Volleyball Club chu 3-1 (25-23, 25-22, 17-25, 25-23)-in an hneh ve bawk.

MVA Cup-ah hian hmeichhiaah champion lai, Kanan Volleyball Club chu Pro-Division atanga an inhnuhdawh avangin kuminah hian an inlan lo.

TNT vs Tuichangral

Mipa lama club paruk inlan zingah PVL champion lai, Thutak Nunpuitu Team (TNT) Volleyball Club leh Tuichangral Volleyball Club chu zan dar 7:00-ah final-ah an inhmachhawn dawn.

Final khel turte hi Pool A-a mite ve ve niin an inkhelh hmasakah khan TNT hian set khatna hloh hmasa chungin 3-2 (16-25, 25-12, 18-25, 25-21, 15-8)-in an lehthal hram a. Tuichangralin final-ah phuba lakna remchang an nei dawn.

An pool-a a sang pahnih an nih avanga semifinal lut an ni a, TNT hian Chhinga Veng Spikers chu 3-0 (25-19, 25-15, 25-16)-a hnehin final an lut a, Tuichangral hian champion lai, Hunthar Volleyball Club chu 3-1 (23-25, 25-20, 25-19, 25-14)-in an hneh ve thung.

State pawn player tel lo PVL!

MVA Cup-a inlante hi MVA hnuaia division sang bera club-te chauh an ni a. PVL-ah chuan club-te hian phalsak an nih angin state pawn player tha an chaw lut thin.

MVA Cup-ah erawh state pawn player lak luh hi phal a ni lo va, hei vang hian Mizo hlanga PVL club-te an inelna, Mizo hlang Pro Volleyball tihna a ni ber.

Kumin PVL-ah khan state pawn player la lut lo awm chhun, TNT-in nomawi an la a, Mizo hlang an nih avangin tan pawh an hlawh phah anga ngaih theih a ni a. Hmeichhia-ah Luangmual an champion a, Mizo player tha rual kawltu ni mah se Gujarati tleirawl, Nipa Bharad-i chu an champion-pui tih ngam a ni.

‘Mizo hlang ngei’ tia duhthu lo sam thinte tan MVA Cup hi an mitthla thin torunament tihna a ni.