Mizorama volleyball club-te inelna sang ber, Pro Volleyball League (PVL)-ah club-ten state pawn player tha an chaw lut thin a, inkhel a tihhmuhnawm sawt rualin ‘Mizo hlang ngei’ tih titi a awm fo thin a, Mizo hlang ngei inelna sang chu karleh Thawhtanni atang hian en tur a awm dawn e.

Mizoram Volleyball Association (MVA) hnuaia division sang ber, Pro-Division-a club-ten an inchuh tur MVA Cup chu Aizawl West Jt. YMA Hall-ah tan a ni dawn a, PVL club hmeichhia leh mipa team an inlan kim ang.

MVA Cup 2023-ah hian mipaah Thutak Nunpuitu Team (TNT), Hunthar, Durtlang North, Tuichangral, Chhinga Veng Spikers leh Hlimen Volleyball Club te an tel kim tura ngaih an ni a. Hmeichhe lamah Luangmual, Durtlang, Bungkawn, Lunglei Serkawn leh Kolasib Diakkawn te an inlan thung ang.

Kumin PVL-ah khan mipaah TNT-in final-ah state pawn player la luttu zinga mi, Hunthar an hneh a. TNT hi Mizo hlanga khel awm chhun an nih avangin vantlangah tantu an ngah phah nia ngaih theih a ni nghe nghe.

Hmeichhe final-ah Luangmualin Kanan an hneh ve thung a, Luangmual hian Mizo player tha tam tak an kawl karah Gujarati tleirawl, Nipa Bharad an champion-pui a tih theih.

MVA Cup-ah erawh re-inforce player an tihte hi lak phal a ni lo va, Mizo hlangin club tin an khel dawn a. PVL-a ‘Mizo hlang ngei’ tia duhthu lo sam thinte tan an mitthla thin tournament a ni dawn tihna a ni.

Inelna hlawhtling tak buatsaih a nih theih nan MVA pawh a tang a, organizing committee dinin hma an la a. Club tinte pawh ngawrh takin an inbuatsaih hlawm.

MVA Cup-ah hian mipaah Hunthar Volleyball Club chu champion lai an ni a, an nomawi kawl lai humhim tumin an inbuatsaih a. Hetih lai hian tun hnai lawka Inter Village Championship-a volleyball thiam ber ni ta, Khawhai player tha tam tak kawltu, Tuichangral Volleyball Club leh Pro Volleyball League 2023 champion TNT ten champion an tum ruh hle bawk.

Hmeichhiaah champion lai, Kanan Veng chu Pro-Division atangin an inhnukdawk a, club thar pahnih, Serkawn Volleyball Club, Lunglei leh Diakkawn Volleyball Club, Kolasib ten Pro League 2023 Champion lai Luangmual VC te hneha champion tumin theihtawpin an inbuatsaih.

Tun hnaiah Mizote zingah volleyball boruak a nung thar a, PVL 2023 mipa final kha a khelhna hmun, R. Dengthuama Indoor Stadium enkawltute chuan thiltih khawm (event) an thlen tawha pungkhawm an tam ber tum ni hiala an hriat thu ZALEN an lo hrilh tawh nghe nghe a. A hnua inter village tournament pawhin hlut a hlawh viau bawk.

Kumin MVA Cup hi December 2 thleng khelh tur a ni dawn a, MVA chuan live telecast-a pek chhuah a tum.