Mizoram Volleyball Association (MVA) hnuaia division sang ber, Pro-Division-a club-ten an inchuh tur, MVA Cup 2023 chu Thawhtanni atang hian khelh tan a ni dawn ta.

Pro-Division club-te hian Mizorama volleyball inelna sang ber, Pro Volleyball League (PVL)-ah state pawn player tha an chaw luh thin a, hetiang hi MVA Cup-ah a theih loh avangin Mizo hlang ngeiin inelna hi an hmachhawn dawn a. PVL khelh laia ‘Mizo hlang ngei’ tia sawi fo thinte tan an duhthusam inelna hmuh tur a awm dawn a ni.

MVA Cup-ah hian Pro-Division-a hmeichhe club panga leh mipa club parukte an inlan dawn a, Aizawl West Jt. YMA Hall-a inelna tan tur hi Inrinni khan fixture tlangzarh a ni.

Mipaah Thutak Nunpuitu Team (TNT), Hunthar, Durtlang North, Tuichangral, Chhinga Veng Spikers leh Hlimen Volleyball Club te an tel kim tura ngaih an ni a. Hmeichhe lamah Luangmual, Durtlang, Bungkawn, Lunglei Serkawn leh Kolasib Diakkawn te an inlan ang.

Mipa hi pool hnihah pathum ve ve-a then niin hmeichhia hi pool hnihah tho, pakhatah pahnih leh pakhatah pathumah then an ni a. Pool khata awmte hi an inkhel kual ang a, a sang pahnih zelin semifinal lutin Ninganiah semifinal khelh tur a ni a. Hmeichhe final hi Zirtawpni zanah khelh tur a ni ang a, Inrinni zanah mipa final khelh a ni thung ang.

A tan niah hian mipa leh hmeichhe inkhel pahnih ve ve a awm nghal dawn a. Chawhnu dar 1:00 atangin hmeichhiaah Pool A atangin Luangmual Volleyball Club leh Bungkawn Volleyball Club, Durtlang Volleyball Club leh Serkawn Volleyball Club an inkhel ang a. Mipaah Hunthar Volleyball Club leh Chhinga Veng Sphikers, TNT Volleyball Club leh Tuichangral Volleyball Club an inkhel bawk ang.

Kumin PVL-ah khan mipaah TNT-in final-ah state pawn player la luttu zinga mi, Hunthar an hneh a. TNT hi Mizo hlanga khel awm chhun an nih avangin vantlangah tantu an ngah phah nia ngaih theih a ni nghe nghe.

Hmeichhe final-ah Luangmualin Kanan an hneh ve thung a, Luangmual hian Mizo player tha tam tak an kawl karah Gujarati tleirawl, Nipa Bharad an champion-pui a tih theih.

MVA Cup-ah erawh re-inforce player an tihte hi lak phal a nih loh avangin Mizo hlangin club tin an khel dawn a. PVL-a ‘Mizo hlang ngei’ tia duhthu lo sam thinte tan an mitthla thin tournament a ni dawn tihna a ni.

MVA Cup-ah hian mipaah Hunthar Volleyball Club chu champion lai an ni a, an nomawi kawl lai humhim tumin an inbuatsaih a. Hetih lai hian tun hnai lawka Inter Village Championship-a volleyball thiam ber ni ta, Khawhai player tha tam tak kawltu, Tuichangral Volleyball Club leh Pro Volleyball League 2023 champion TNT ten champion an tum ruh hle bawk.

Hmeichhiaah champion lai, Kanan Veng chu Pro-Division atangin an inhnukdawk a, club thar pahnih, Serkawn Volleyball Club, Lunglei leh Diakkawn Volleyball Club, Kolasib ten Pro League 2023 Champion lai Luangmual VC te hneha champion tumin theihtawpin an inbuatsaih.

Tun hnaiah Mizote zingah volleyball boruak a nung thar a, PVL 2023 mipa final kha a khelhna hmun, R. Dengthuama Indoor Stadium enkawltute chuan thiltih khawm (event) an thlen tawha pungkhawm an tam ber tum ni hiala an hriat thu ZALEN an lo hrilh tawh nghe nghe a. A hnua inter village tournament pawhin hlut a hlawh viau bawk.