Mizoram Volleyball Association (MVA) chuan LPS Vision nena thawh dun zel a, huam zau leh lian zawka Pro Volleyball League chhunzawm turin ruahmanna a siam. July ni 19 atanga khelh tan tur Inter Branch YMA Volleyball tournament huaihawt a ni dawn bawk.

MVA executive committee thu khawm chuan MVA hruaitute, working committee leh LPS thawh hona tha tak avangin Pro Volleyball League vawi ngana ropui leh hlawhtling taka neih a nih avangin lawmawm a ti hle a, season tharah LPS nen thawh ho zel theih ni se an ti.

May 6 atanga 27 chhungin R Dengthuama Indoor Stadium, Mualpuiah Zothan Autoworks Pro Volleyball League neih a ni a, mipa team tha panga inel zingah Durtlang North-in final-ah Thutak Nunpuitu Team hnehin an champion a, hmeichhe team pali inel zingah Bethlehem Vengthlang an champion ve thung a, final-ah Bungkawn an hneh a ni.

Covid-19 leng leh sum harsatna avangin 2019 hnuah kum hnih a zawnin Mizoram volleyball inelna sang ber thulh a ni a, hei hian nghawng a nei zui zel niin MVA chuan a hria a, chutih rualin kuminah hlawhtling taka Pro Volleyball League tharthawh leh a nih avangin rah tha a chhuah a, Pro Division-a tel dil an awm zui nghal a ni.

MVA chuan Pro Division-ah mipa team khat leh hmeichhia team hnih lak belh thei turin ruahmanna lailawk a siam a, June 24 khian an pawl hruaitu an tlan dawn avangin hruaitu tharten thu tawp an siam a ngai thung dawn a ni.

MVA chuan Mizoram hmun hrang hrangah volleyball boruak a nung thar leh mek niin a hria a, Joint YMA Indoor Stadium thar, Vaivakawnah volleyball khelhna tur buatsaih a nih avangin lawmawm a ti hle a, July 19 atangin Inter Branch YMA Volleyball tournament huaihawt a ni dawn a, hlawhtling taka buatsaih theih an inbeisei.