ZALEN, Oct. 27, 2024: Mizoram Volleyball Association (MVA) buatsaih, MUCO Bank Ltd. MVA Invitation Tournament 2024-ah mipaah Tuichangral Volleyball Club chu an champion ta a, hmeichhiaah Kolasib Volleyball Club-in nomawi an hawn bawk.

Thawhtanni atanga Thutak Nunpuitu Team (TNT) hmunpui, Muanna Veng, Aizawla inelna neih hi Inrinni khan hmeichhia leh mipa final khelh niin zawh fel a ni.

Hmeichhe final-ah Kolasib hian Pro Volleyball League (PVL) champion lai, Luangmual Volleyball Club chu set hmasa ber hloh chungin 3-1 (21-25, 25-21, 25-20, 25-12)-in an hneh a, nomawi an la.

Group stage-ah Kolasib hi Luangmual lakah 3-1 (25-22, 25-19, 25-27, 25-19)-in an lo tlawm tawh a, final-ah phuba lain an tlawmna zat chiahin an hneh let ve ta a ni.

Final-ah hian Kolasib spiker, Kawnpui nula, Lalhriatpuii leh Serkawn nula, Laltleipuii (Tetei) an langsar a, Lalmuanpui'n a dang thla tam viau bawk.

Hriatpuii hi Best Spiker-ah thlan zui niin Kolasib hian mi mal lawmman an hui fai vek bawk a. Best Setter-ah Lalrinzuali thlan a ni a, Best Blocker- Lalmuanpuii thlan niin Best Receiver atan an libero, Flora Lalrinmawii thlan a ni bawk.

Mipa final-ah pawh hmeichhe final ang bawkin Tuichangral chuan Chhinga Veng Spikers laka set hmasa ber an hloh hnuah 3-1 (24-26, 25-19, 25-20, 25-23)-in an lehthal a. He inkhel hi a bul atanga a tawp thlengin a hmuhnawm tih ngam a ni.

Set khatna hi Tuichangral hian an la nghal mai dawn emaw tih turin hma an hruai hman a; mahse, Chhinga Veng hian Fabian Lallunghnema leh Theiriat tlangval, Lalhriatpuia te hmanga umin an chhuhsak hlauh zawk.

Set hnihna atanga a tawp thlengin an inum tawk viau zel a. Tuichangral tan captain tawnhriat nei tha, Lalbiakmuana chu an veng lakah a che na viau a, Johan Vanneihsanga’n a pui tha hle bawk.

Tuichangral tan hian PVL 2024-a Mizo player tha bera thlan, Zomuansanga’n inkhel hmasa lam a phak lo deuh va, hun eng emaw chen hahchawlhtir a nih hnuah hun tawpah erawh a pawimawhna langin an champion-na point hlawh chhuaktu pawh a ni leh ta tho a ni.

Tuichangral hian team lawmman bakah Best Receiver lawmman tih loh mi mal lawmman pawh an hui vek a. Best Spiker-ah final-a che tha tak, an captain Biakmuana thlan niin Best Setter-ah PVL-a Best Setter pawh lo ni tawh, C. Zonunmawia (C-tea) thlan niin Best Blocker pawh an bang rinawm, Vanlalmawia hnenah hlan a ni.

Best Receiver chawimawina erawh inkhel hmasa lam leh final-a an tumpui spiker thate vuak tlak tur harsa tak tak lo la kang thei tak, Lalhmingsanga, Chhinga Veng Spikers hnenah hlan a ni.