ZALEN, Oct. 25, 2024: Mizoram Volleyball Association (MVA) buatsaih, MUCO Bank Ltd. MVA Invitation Tournament 2024 chu final khel tur a hriat ta a. Mipaah Tuichangral Volleyball Club leh Chhinga Veng Spikers an inhmachhawn ang a, hmeichhiaah Luangmual Volleyball Club leh Kolasib Volleyball Club an inhmachhawn bawk ang.

Thutak Nunpuitu Team (TNT) hmunpui, Muanna Veng, Aizawla inelna nghahah hian Zirtawpni zan khan mipa semifinal khelh zawh a ni a. Inkhel hmasa zawkah inelna thlengtu, TNT Volleyball Club leh Tuichangral Volleyball Club inhmachhawnin 3-0 (25-17, 36-34, 25-19)-in mikhual zawkin hnehna an chang.

He inkhelah hian Tuichangral tan Pro Volleyball League (PVL) 2024-a Mizo player tha bera thlan, Zomuansanga a thawhhlawk leh hle a. Chhinga Veng tlangval, Lalbiakmuana pawhin a tawnhriat neih that a lantir nual bawk.

TNT tan Vanlaltanchhana (Valbuanga) leh Kanan Veng tlangval, Zosangzuala (Lalmama) che tha viau mah se an player lak luh thar, Saidingpuia Sailo (Saitea) a che tha tawk lo va, an tuar a tih theih.

Semifinal hnuhnung zawkah Chhinga Vengin PVL khel thar tur, Khawbel chu set khatna hloh hmasa zet chungin 3-1 (19-25, 25-21, 25-19, 25-22)-in an hneh ve thung a. Chhinga Veng player hriat hlawh, Fabian Lallunghnema'a ni dang a pha lo deuh va; mahse, Lalhriatpuia'n a aiawhin a vaw tla hnem hle.

Final hi Inrinni tlaiah khelh a ni dawn a, hmeichhiain khel hmasain mipain a zui dawn a ni.