ZALEN, September 11, 2025: Season thara Mizorama pro division club-te inelna hmasa ber, MSSC Golden Jubilee Celebration MVA Season Opening Tournament khelh mek chu Zirtawpni zan hian final khelh a ni dawn a. Hmeichhiaah tun season-a pro club thar ve ve, Chhinga Veng Spikers leh Tuichangral Volleyball Club an intum ang a, mipaah Pro Voleyball League champion lai, Anastasia Electric Veng Volleyball Club leh Khawbel Volleyball Club an intum ang.

Group stage an khelh zawh hnuah hmeichhe semifinal hmasa zawkah Nilaini khan Chhinga Veng Spikers chuan Eric Pautu Academy chu 3-1-a hnehin final an lo lut tawh.

A hnuhnung zawk, Ningani khan YMA Indoor Stadium, Electric Veng, Aizawla khelhah Tuichangral hian Games & Sports Association, ITI Veng, Aizawl chu 3-1 (23-25, 25-7, 25-19, 25-4)-a hnehin final an lut ve leh.

Hmeichhe final-a intum turte hi tun season-a pro division-a awm thar ve ve an ni a, tlai dar 04:00-ah Electric Vengah final-ah an inhmachhawn dawn a ni.

Ningani veka mipa semifinal khelh hmasak zawkah Anastasia Electric Veng chuan Mizorama volleyball veng hlun bera chhal ngam, Hunthar Volleyball Club chu 3-0 (25-19, 25-23, 25-18)-a hnehin final an lut hmasa a. Khawbelin Tuichangral 3-0 (25-18, 25-18, 25-20)-a hnehin final an lut zui bawk.

Mizoram Volleyball Association (MVA) buatsaih inelna kal mekah hian mipa hi Pool A leh B-ah team thum ve ve awmin pool khata awmte an inkhelh kual hnua a hniam ber ve ve, Sihphir Volleyball Club leh Chhinga Veng Spikers an tla a, a sang pahnihin semifinal an lut.

Final inbeng thleng pahnih hi pool khata awm niin Anastasia hian 3-0-in Nilaini tlai khan an hneh lo nghe nghe a, Pool B inkhel dangah Chhinga Veng Spikers (3-1) hnehin an pool-a pahnihna niin an tlang a. Final-ah hian phuba lak theihna remchang an nei dawn a ni.

Khawbel hian Pool B-a Anastasia an hneh bakah Chhinga Veng lakah 3-1-a chak bawkin a sang berah awmin semifinal an lut a, final an inbeng thleng zui.

Thawhtanni atanga Tuikual Indoor Stadium, Tuikual North, Aizawla inelnaah hian pro division-a mipa club pasarih awmah Thutak Nunpuitu Team (TNT) Volleyball Club tih loh inlan vekin hmeichhe team li an inlan kim bawk.

MSSC Golden Jubillee, MVA Season Opening Tournament 2025

Day 4 @ YMA Indoor Stadium, Electric Veng

Women’s Semi Final

Tuichangral bt GSA, ITI Veng 3-1 (23-25, 25-7, 25-19, 25-4)

Men’s semi-final

Anastasia Electric Veng bt Hunthar 3-0 (25-19, 25-23, 25-18)

Khawbel VC bt Tuichangral 3-0 (25-18, 25-18, 25-20)

September 12, 2025 (Zirtawpni)

Women’s final (04:00 pm)

Chhinga Veng Spikers Vs Tuichangral VC

Men’s final (8:00 pm)

Anastasia Electric Veng VC Vs Khawbel VC