ZALEN, September 10, 2025: Season thara Mizorama pro division club-te inelna hmasa ber tur, MSSC Golden Jubilee Celebration MVA Season Opening Tournament kal mekah hmeichhe lamah final lut pakhat a hriat ta a, Ningani hian final luh inchuhna inkhel pathum a awm zui dawn.

Thawhtanni atanga Tuikual Indoor Stadium, Tuikual North, Aizawla inelnaah hian pro division-a mipaah club pasarih awmah Thutak Nunpuitu Team (TNT) Volleyball Club tih loh inlan vekin hmeichhe team li an inlan kim bawk.

Group stage an khelh zawh hnuah hmeichhe lam semifinal hmasa zawkah Nilaini khan Chhinga Veng Spikers chuan Eric Pautu Academy chu 3-1 (25-15, 13-25, 22-25, 16-25)-a hnehin tun inelnaa final lut hmasa ber a ni.

Semifinal hnuhnung pathum atang hian YMA Indoor, Electric Veng, Aizawlah inelna khelh chhunzawm tur a ni a, final pawh khelh zui nghal a ni ang.

Hmeichhe semifinal hnuhnung zawkah Tuichangral Volleyball Club leh Games & Sports Association, ITI Veng, Aizawl inkhelin Chhinga Veng tum tur an zawng dawn.

Mipa semifinal khelh zui tur niin Hunthar Volleyball Club leh Anastasia Electric Veng Volleyball Club inkhel hmasain a hnuhnungah Khawbel Volleyball Club leh Tuichangral an intum zui ang.

Mizoram Volleyball Association (MVA) buatsaih inelna kal mekah hian mipa hi Pool A leh B-ah team thum ve ve awmin pool khata awmte an inkhelh kual hnua a hniam ber ve ve, Sihphir Volleyball Club leh Chhinga Veng Spikers an tla ang a, a sang pahnihin semifinal an lut.

Group stage-ah Hunthar hian vawi hnih khelhah Tuichangral (3-1) leh Sihphir (3-2) hnehin Pool A-ah a sang berah an awm a. An hmachhawn tur, Anastasia hian Pool B-ah Chhinga Veng Spikers (3-1) hnehin Khawbel lakah 3-0-in an tlawm a, pahnihna niin an tlang ve thung.

Khawbelin Pool B-a Anatasia an hneh bakah Chhinga Veng lakah 3-1-a chak bawkin a sang berah awmin semifinal an lut a. An hmachhawn tur, Tuichangral hian Pool A-ah Hunthar an hneh loh hnuah Sihphir (3-1) lakah Nilaini khan hnehna changin pahnihna niin a thiam pali zingah an tel thei bawk.

Ningania semifinal pathum khelh zawh hnuah Zirtawpni tlai dar 04:00-ah hmeichhiain final an khel ang a, zan dar 08:00-ah mipa final-in a zui ang.

September 11, 2025 Fixture @ YMA Indoor, Electric Veng

Tuichangral vs GSA, ITI Veng (hmeichhia)

Hunthar vs Anastasia Electric Veng (mipa)

Khawbel vs Tuichangral (mipa)