Mizoram Wrestling Association (MWA) chuan kum khat awh tur wrestling zirna camp a buatsaih dawn a, man chawi ngai lovin a duh apiang luh theih a ni dawn.

Wrestler tha zawk chher chhuah nan MWA hian Mizoram State Sport Council (MSSC) nena an thawh dunna hnuaiah Non Residential Coaching Camp hi a buatsaih dawn a. MSSC Ramhlun Sport Complex, Wrestling Hall-ah August 1, 2023-a kalpui tan tur niin a zir duh tan a hmunah inziak luh theih a ni ang.

Coaching camp hi ni tin tlai dar 3:00 leh dar 5:00 inkara kalpui tur niin Sports Authority of India (SAI) hnuaia sports zirna hmun, Asia khawmuapuia sports zirna lian ber ni bawk, NIS tia hriat lar, Patiala, Punjab-a Netaji Subhas National Institute of Sports atanga wrestling zir chhuak, F.Vanlalsiama kaihhruaina hnuaiah kalpui tur a ni ang.

Thla thar atanga coaching camp tan tur hi Aizawl district-ah chuan kum khat daih tura ruahman phawt a ni a, a tul dan anga pawh sei theih tura ruahman a ni a. Wrestling association din tawhna district-ah a tahtawlin thla khat awh zel kalpui tura ruahman a ni bawk.

MWA hian September 27-29 chhung hian Kolasib-ah Inter District Wrestling Championship a buatsaih dawn bawk a, Mizoram chhunga wrestling lama tui mite chu tel vek tur leh mahni hnaivai wrestling club-a inziak lut turin wrestler-te a ngen bawk.