ZALEN, Mar. 23, 2025: Pathianni tuk khawvar hma deuh khan Lawngtlaiah Myanmar-a bungraw dah haw lam nia hriat, mi pathum chuanna pik-up truck chesualin pahnih an thi a, pakhat hi a khalhtu a ni.

Thudawn danin thite hi lirthei khalhtu, V. Lalhmangaihsanga (42), AOC Veng, Lawngtlai leh a mi phurh zinga pakhat, Myanmar lam mi an ni a. A chuang ve dang pakhat hian hliam a tuar bawk.

V. Lalhmangaihsanga hi Inrinni khan Myanmar-ah bungraw dahin a kal a, a mi phurhte hi Zawngling khaw daia lo phartute niin Pathianni zing dar 04:00 vel khan Lawngtlai 71, Tetea Petrol Pump bulah kawng thlangah an tlan liam nia hriat a ni.

An chetsual chhan hi chiang taka hriat ni lo mah se a khalhtu muthilh vang a nih rin a ni.

V. Lalhmangaihsanga ruang hi Pathianni chawhnu khan vui a ni.