Myanmar sipai sorkar chuan an kum thar lawmna pualin nimin khan mi tang 23,184 zet a chhuah niin prisons department thupuangtu chuan a sawi a. An zingah hian February 1-a thuneihna an chan hnua an man tlem azawng an tel rin a ni.

Nimin kha Myanmar ramah chuan kum thar an lawm tan ni hmasa ber leh Buddhist temple tlawhna hun atana chawlh ni nga an neih thina a ni tawpni a ni a. Tuikawngah lawng kar leh khawlaiah an party nasa hle thin.

Mipui rorelna duhtute chuan kumina an  kut hman hi thulh an phut a, mipuite chu sipaiten an chhuhsak mipui rorelna tun din a nih leh theih nana nawrna hun atana hman an duh.

Mipui rorelna duhtute duh ang hian Mandalay khawpuiah chuan khawlaiah mipui an pung khawm leh a. Social media-a thlalak thehdarh atang chuan an tam hle tih a hmuh theih.

Khaw awm dan nuam lo hle mah se Shan state-ah pawh sipai duh lohna hi mipuiin an lantir bawk.

Sipai sorkar hian kum thar lawm nana mi tang sang tel an chhuah rual hian anmahni duh lotu mi 832 man theihna an tichhuak bawk.